Трамп Мадурони қўлга олиш операцияси қандай ўтганини маълум қилди
Америка Қўшма Штатлари президенти Доналд Трамп Венесуэла президенти Николас Мадуронинг АҚШ махсус кучлари томонидан «қалъа ичида» қўлга олинганини маълум қилди. Трампнинг айтишича, Мадуро ва унинг рафиқаси Америкага Iwo Jima авиаташувчи кемаси орқали Ню-Йоркка олиб келинади.
«Уларни вертолётда авиаташувчига келтиришган ва ишончим комил, бу парвоз уларга ёққан. Лекин улар кўплаб одамларни ўлдирган, буни ёдда тутиш лозим», – деди АҚШ президенти.
Трампнинг сўзларига кўра, Венесуэла раҳбарини қўлга олиш учун ўтказиладиган операция аввалига тўрт кун олдин амалга оширилиши керак эди, аммо об-ҳаво шароити сабабли кечиктирилган. Ушбу операцияда иштирок этган ҳарбийлар орасида қурбонлар йўқ, бир неча аскарлар эса яраланган.
«Биз буни тўрт кун олдин амалга оширмоқчи эдик, аммо об-ҳаво ноқулай бўлди», — деди у.
Трамп операциядан бир ҳафта олдин Мадуро билан гаплашганини ва уни таслим бўлишга чақирганини маълум қилди. Шунингдек, АҚШ бош прокурори Памела Бонди Венесуэла президентига қарши наркотерроризм, кокаин ташиш, қурол-яроғ сақлаш ва Қўшма Штатларга қарши пулемётлар ва портловчи қурилмаларни сақлаш айбловларини қўйганини маълум қилди.
Америка президентининг сўзларига кўра, ушбу операция — Мадуро ва унинг рафиқаси учун муҳим сиёсий ва ҳарбий натижаларга олиб келиши мумкин.