Қўқонлик “табиб” қамоқдан чиқди ва суд қарорини адолатсиз деб атади
Шов-шувли халқ табиби Иқбол Солиев маъмурий қамоқ жазоси муддати тугагач, озодликка чиқди. У дарҳол Instagram’даги обуначиларига мурожаат қилиб, ҳуқуқ-тартибот идоралари “лицензиясиз фаолият юритган” деган даъвони рад этди ҳамда суднинг маъмурий жавобгарлик ҳақидаги қарорига рози эмаслигини билдирди. Бу ҳақда podrobno.uz хабар беради.
Солиевнинг айтишича, 2024 йилдан буён тегишли ҳужжатларсиз ишлагани ҳақидаги гаплар ҳақиқатга тўғри келмайди. У Ўзбекистон халқ табобати ассоциацияси томонидан берилган гувоҳномалари, жумладан муддатсиз ҳужжатлари борлигини, шунингдек Қозоғистон соғлиқни сақлаш органларидан олинган сертификат ва гувоҳномага эга эканини таъкидлади.
Мурожаатда Солиевнинг адвокати ҳам фикр билдириб, тарқалаётган маълумотларнинг бир қисмини “нотўғри ва асоссиз” деб атади. У хусусан, табибнинг лицензияси муддати тугагани ҳақидаги хабарларни инкор этди. Ҳимоячи, шунингдек, Солиевга нисбатан қўлланган маъмурий модда билан ҳам келишмай, унинг фаолияти “оммавий тарғибот” сифатида нотўғри талқин қилинганини, маълумот тарқатиш эса қонун рухсат берган доира ичида бўлганини билдирди.
Аввалроқ интернетда реклама роликлари пайдо бўлгач, Солиев тегишли лицензиясиз хизмат кўрсатганликда айбланиб, маъмурий жавобгарликка тортилгани хабар қилинганди. Қўқон шаҳар ИИБ маълумотига кўра, ассоциация берган ҳужжатларининг амал қилиш муддати 2024 йил 21 декабрда якунланган. Йил бошида ҳам у рухсатсиз хизмат кўрсатгани учун жаримага тортилган, бироқ фаолиятини давом эттиргани айтилади. Ноябр ойида унга нисбатан яна маъмурий баённома расмийлаштирилиб, иш судга оширилган, 17 декабр куни эса суд уни 10 суткага қамоқ жазосига ҳукм қилган.