Камбоджа ва Таиланд ўт очишни тўхтатиш бўйича келишувга эришди
Камбоджа ва Таиланд чегарадаги тарангликни юмшатиш мақсадида ўт очишни тўхтатиш бўйича келишув имзолади. Reuters хабарига кўра, Таиланд Мудофаа вазирлиги вакили сулҳ Тошкент вақти билан соат 10:00 да (05:00 GMT) кучга кирганини маълум қилди. Бу ҳақда kursiv.uz беради.
Унинг айтишича, келишув кучга кирганидан кейин Бангкок ҳозирча Камбоджа билан чегарада отишмалар бўлгани ҳақида хабар олмаган. Пномпен ҳам сулҳ бузилгани юзасидан баёнот бермаган. Келишув ижросини ASEAN кузатиб боради.
Томонларнинг қўшма баёнотида ҳарбийлар ҳозирги жойлашувни сақлаб қолиши ва қўшимча кўчиришлар қилинмаслиги қайд этилган. Шунингдек, Пномпен ва Бангкок тинч аҳолига нисбатан куч ишлатмаслик бўйича ҳам келишиб олди.
Бундан ташқари, Таиланд сулҳ режими 72 соат давомида бузилмаса, 18 нафар камбоджалик аскарни топширишини билдирди. Reuters маълумотига кўра, чегара можароси давомида икки томондан жами камида 101 киши ҳалок бўлган, 500 мингдан ортиқ аҳоли эса уй-жойини тарк этишга мажбур бўлган. Ҳарбийлар тўқнашувларда ракета ва артиллериядан фойдаланган.
2025 йилги дунёнинг энг кучли армиялари рейтингида Камбоджа 95-ўринда қайд этилган бўлса, Таиланд 25-ўринни эгаллаган.