Тошкентда хавфли дрифт қилган ҳайдовчи жазолангани маълум бўлди
Тошкентда йўл ҳаракати қоидаларини бузган ва хавфли дрифт уюштирган ҳайдовчи жавобгарликка тортилди. Бу ҳақда Podrobno.uz хабар беради.
Интернетда тарқалган видеода ВАЗ-2107 автомобили сирпанчиқ йўлда айланиши, унга арқон орқали икки киши боғланган ҳолда импровизация қилинган чанада ҳаракатланаётгани акс этган. Ҳодиса 21 декабр куни кечаси содир бўлган.
Йўл ҳаракати хавфсизлиги хизмати матбуот хизматининг маълум қилишича, ҳайдовчи ушбу видеони ўзи Instagram'га жойлаштирган. Аммо бу хавфли ўйин назоратдан чиқиб кетган — дрифт пайтида автомобилга боғланган экстремаллардан бири мувозанатни йўқотиб, панжарага урилган ва ариққа тушиб кетган, иккинчиси эса йўлнинг ўртасида ағдарилиб кетган.
Ҳайдовчига нисбатан йўл қоидабузарлиги бўйича маъмурий баённома тузилди. Ушбу қоидабузарлик учун 25 базавий ҳисоблаш миқдорида (тахминан 21,5 миллион сўм) жарима ва ҳайдовчилик ҳуқуқидан бир йилдан икки йилгача маҳрум қилиш жазоси белгиланган.
Ҳуқуқни муҳофаза қилиш органлари томонидан эълон қилинган видеода қоидабузар ўз хатосини тан олиб, бундай ҳаракатларни такрорламасликка ваъда берган. Бунгача Самарқандда ҳам шунга ўхшаш ҳолат кузатилган эди.
"Жигули" ҳайдовчиси хавфли маневрлар қилиб, бошқарувни йўқотган ва автомобилни йўл четига чиқариб юборган. Ҳодиса оқибатида авария содир бўлмаган.
Автомобил жарима майдончасига жойлаштирилиб, қоидабузарлик бўйича баённома судга юборилган.