Янги йил арафасида ўзбекистонликлар неча кун дам олади?
Яқинлашаётган Янги йил байрами муносабати билан Ўзбекистонда қўшимча ёки бошқа санага кўчирилган дам олиш кунлари жорий этилмайди. Бу ҳақда амалдаги меҳнат қонунчилигига таяниб маълум қилинди. Демак, йил якунида иш ва дам олиш тартиби одатий тарзда сақланиб қолади.
Маълум қилинишича, 31 декабрь куни байрам арафаси сифатида ҳисобланади ва ушбу санада барча ходимлар учун иш вақти камида бир соатга қисқартирилади. Бу тартиб Меҳнат кодексининг 187-моддасида аниқ белгилаб қўйилган бўлиб, иш берувчилар мазкур талабга амал қилишлари шарт.
2026 йил 1 январь — пайшанба куни Янги йил байрами муносабати билан расмий дам олиш куни ҳисобланади. Бироқ байрамдан кейин қўшимча таътил кунлари назарда тутилмаган. Хусусан, 2 январь — жума куни барча ходимлар учун одатий иш куни бўлади.
3 январь — шанба куни эса иш ҳафтаси турига қараб белгиланади: беш кунлик иш режимида ишлайдиганлар учун бу кун дам олиш ҳисобланса, олти кунлик иш ҳафтасида меҳнат қилувчилар учун у одатдаги иш куни бўлиб қолади. 4 январь — якшанба эса барча учун анъанавий дам олиш куни сифатида белгиланган.
Шу тариқа, йил охири ва янги йил бошида қўшимча таътиллар режалаштирилмаган. Фуқаролардан байрам кунларини шу жадвал асосида режалаштириш, иш берувчилардан эса меҳнат қонунчилиги талабларига қатъий риоя қилиш сўралмоқда.