Најголемата пајажина на светот во пештера меѓу Грција и Албанија

Истражувачите открија комплекс од пајажина за кој велат дека е најголем познат во светот, јавува германската новинска агенција ДПА. Пајажината во оддалечена пештера на границата меѓу Грција и Албанија, позната како Сулфурна Пештера (Sulphur Cave), покрива површина од околу 106 метри квадратни и е дом на повеќе од 111.000 пајаци, се наведува во истражувањето објавено минатиот месец во списанието Subterranean Biology.

Огромната пајажина се протега по карпестите ѕидови на еден премин и се состои од безброј субструктури во облик на инка, според сликите и видеото објавени во грчките медиуми оваа недела.

Научниците ја опишуваат во својот труд како „вонреден склоп на колонијални пајаци“. Структурата е еден вид мозаик од пајажина што бил заеднички изграден од два различни вида пајаци – однесување што досега не било забележано.

Колонијата се состои од околу 69.000 примероци од обичниот домашен пајак Tegenaria domestica, кој го има и во Централна Европа, и 42.000 примероци од видот Prinerigone vagans, кој припаѓа на семејството пајаци од круната на дрвото (canopy spider). Двата вида се вообичаено солитарни (живеат сами) и обично се наоѓаат во близина на човечки населби.

Според водечкиот автор Иштван Урак од Универзитетот Сапиентиа во Романија, екстремните услови во темната средина со висока содржина на сулфур можеби ја фаворизирале оваа необична соживот.