Туркияда 20 ёшли ўзбекистонлик киберфирибгар қўлга олинди
Туркия ва Ўзбекистон Ички ишлар вазирликлари ҳамкорлигида ўтказилган махсус тезкор операция натижасида киберфирибгарликда гумон қилинган 20 ёшли Ўзбекистон фуқароси Умид Зоҳиржонов қўлга олинди ва Ўзбекистонга қайтарилди.
Бу ҳақда мамлакатнинг Истанбул шаҳридаги Бош консулхонаси маълум қилди.
Маълумотларга кўра, 2005 йилда туғилган Умид Зоҳиржонов Дилшод ўғли интернет орқали турли онлайн фирибгарлик усуллари билан 10 дан зиёд фуқаронинг маблағини ўзлаштирган. Ушбу шахс халқаро қидирувда бўлган.
Расмий маълумотда қайд этилишича, унинг жиноий хатти-ҳаракатлари натижасида жабр кўрган фуқаролар Ўзбекистон Ички ишлар вазирлигига, унинг ҳудудий бўлинмаларига ёки Истанбулдаги Бош консулхонага мурожаат қилишлари мумкин.
Шу билан бирга, масъул идоралар таъкидлаганидек, жиноий жавобгарликдан қочиб, хорижда яшириниб юрган ҳар бир шахсга нисбатан қидирув ва жиноий таъқиб изчил равишда давом эттирилади.
Истанбулдаги Бош консулхона сўнгги пайтларда фуқаролар томонидан фирибгарлик ҳолатлари бўйича мурожаатлар кўпайганини маълум қилар экан, одамлардан ҳушёр бўлишни ва шубҳали онлайн таклифларга ишонмасликни сўради.