John Deere компанияси Ўзбекистонга 300 млн долларлик техника етказади
Американинг John Deere компанияси Ўзбекистон ҳукумати билан $300 миллионлик қишлоқ хўжалиги техникасини етказиб бериш бўйича келишув имзолади. Ушбу шартнома Ўзбекистон Президенти Шавкат Мирзиёев ва АҚШ савдо вазири Говард Латник иштирокида ўтказилган икки томонлама келишувлар доирасида имзоланган.
Маблағнинг ярми, яъни $150 миллион, АҚШнинг Айова штатидаги John Deere заводида ишлаб чиқарилган пахта териш машиналарини сотиб олишга йўналтирилади. Шунингдек, Ўзбекистон ва Boeing корпорацияси ўртасида Uzbekistan Airways авиакомпанияси учун саккизта янги 787 Dreamliner самолётини етказиб бериш бўйича шартнома имзоланди.
Шу тариқа, Ўзбекистоннинг умумий буюртмалар портфели 22 самолётга етди. Мазкур келишувлар АҚШ ва Марказий Осиё мамлакатлари ўртасидаги йирик ишбилармонлик учрашуви доирасида амалга оширилди.
Унда умумий қиймати $25 миллиарддан ошиқ келишувлар эълон қилинди, жумладан, Ўзбекистон билан боғлиқ лойиҳалар ҳам мавжуд.