Хоразмда профилактика инспектори 1 минг доллар пора билан ушланди
Хоразм вилоятида профилактика инспектори пора олаётган пайтда қўлга олинди, деб хабар берди Ички ишлар вазирлиги ахборот хизмати.
Маълумотларга кўра, бир фуқаро шериги билан очган хусусий корхонадаги ҳужжатлар сохталаштирилгани ва даромадлар ноқонуний равишда ўзлаштирилаётгани бўйича мурожаат қилган.
Шу жараёнда мазкур ҳудуд учун масъул профилактика инспектори фуқарога “масалани ижобий ҳал этиш”ни ваъда қилиб, экспертиза хулосасини унинг фойдасига чиқариш эвазига 1 000 АҚШ доллари миқдорида пора талаб қилган.
Тезкор тадбир давомида инспектор Хива шаҳрида пулни олаётган вақтида далилий ашёлар билан қўлга олинган.
Ҳозирда ҳолат юзасидан жиноят иши қўзғатилиб, ходимга нисбатан қамоқ эҳтиёт чораси қўлланилган. Тергов Хоразм вилояти прокуратураси назоратида олиб борилмоқда.