Машҳур қўшиқчи Дуа Липа энди гўзаллик оламида: ўз косметика брендини чиқарди
Машҳур қўшиқчи Дуа Липа ўзининг шахсий юз парвариши линиясини тақдим этди. “Дуа” номли янги коллекция Британиянинг “Augustinus Bader” косметик бренди билан ҳамкорликда ишлаб чиқилган, деб хабар беради Vogue.
Коллекция атиги учта маҳсулотдан иборат: тозаловчи восита, витаминли комплекс ва намловчи крем. Уларнинг нархи 40 дан 80 долларгача бўлиб, маҳсулотлар бренднинг расмий сайтида аллақачон сотувга чиқарилган.
Дуа Липа янги линиянинг креатив директори сифатида бевосита жараёнда иштирок этган. У дизайн, текстура ва бренд концепциясини шакллантиришда шахсан қатнашган. Линия минимализм фалсафасини акс эттиради — соддалик, тозалик ва илмий асосланган парвариш.
“Мен бу коллекцияни кундалик ҳаётим учун яратдим — тоза, содда ва самарали. TFC5 технологияси туфайли 'Дуа' маҳсулотлари терининг индивидуал эҳтиёжларига мослашади ва унинг соғломлигини мустаҳкамлайди,” — деди Дуа Липа.
Коллекциядаги маҳсулотлар:
– Balancing Cream Cleanser (€38) — макияж ва SPF қолдиқларини мулойимлик билан тозаловчи крем-гель;
– Supercharged Glow Complex (€78) — терини тиклайдиган ва табиий ялтираш берувчи витаминли комплекс;
– Renewal Cream (€72) — намликни сақловчи, эластикликни оширувчи ҳимоя крем.
“Augustinus Bader ” бренди илгари Виктория Бекҳем ва София Коппола билан ҳам ишлаган. Янги “Дуа” линияси эса ёш аудиторияга мўлжалланган бўлиб, замонавий парваришнинг янги стандартини белгилаши кутилмоқда.