АҚШ Колумбия президентининг визасини бекор қилди
АҚШ Колумбия Президенти Густаво Петронинг визасини бекор қилди. Бу Петро АҚШ аскарларини Доналд Трампнинг буйруқларига бўйсунмасликка чақиргани ортидан содир бўлди. Давлат департаменти унинг сўзларини “хавфли ва қўзғатувчи” деб атади.
Петро БМТ йиғилиши учун АҚШда бўлган ва шу кунларда Кариб денгизида гиёҳванд моддалар ташувчи кемаларга қарши Трамп маъмурияти томонидан ўтказилган ҳужумларни тергов қилишни талаб қилган эди.
Нутқида Петро АҚШ аскарларини инсониятга қуролни қаратмасликка чақириб, “Трампнинг буйруқларига бўйсунмасликни” айтган. АҚШ эса бу сўзларни “аскарларни буйруқларга бўйсунмаслик ва зўравонликка чақириш” деб танқид қилди.
Петронинг АҚШ билан муносабатлари сўнгги ойлар ичида совуқ тус олган. Колумбия раҳбари БМТдаги нутқида АҚШнинг наркотикга қарши ҳаракатларини танқид қилган.