Германияда сайлов арафасида номзодлар ўлими муҳокамада

Германия сиёсий майдонида ғалати ва ноодатий ҳолат юз берди. Сентябрь ойида бўлиб ўтиши режалаштирилган маҳаллий сайловлар арафасида Шимолий Рейн-Вестфалияда етти нафар номзод ҳаётдан кўз юмди. Бу воқеа мамлакат жамоатчилиги орасида катта қизиқиш уйғотди ва кўплаб саволларга сабаб бўлди, деб хабар қилди Euro News.

Маълумотларга кўра, ҳаётдан кўз юмган номзодларнинг барчаси “Германия учун муқобил” (AfD) партияси вакиллари бўлган. Шу боис айрим сиёсий кузатувчилар ва журналистлар уларнинг ўлимларини фитна эҳтимоли билан боғлашдан тийилмади. Айниқса, айнан бир партия аъзолари ҳалок бўлгани жамоатчиликда турли гумонларга йўл очди.

Бироқ маҳаллий ҳокимият мутасаддилари бу каби фаразларни рад этмоқда. Уларнинг айтишича, сайловлар олдидан номзодларнинг вафот этиши жуда кам ҳолатларда учраб турса-да, тарихда бундай мисоллар бор. Аммо бу галдаги ҳолатда ўлимлар сони одатдагидан кўпроқ бўлгани ҳақиқат.

Полиция томонидан берилган расмий изоҳга кўра, ҳозирча тўрт нафар номзоднинг табиий сабабларга кўра вафот этгани тасдиқланган. Қолган уч ҳолат бўйича эса тергов ҳаракатлари давом этмоқда.

Аналитикларнинг фикрича, сайлов олдидан бундай ҳолатлар сиёсий муҳитда турли муаммолар ва тахминларга йўл очиши мумкин. Бу эса фуқароларнинг ишончи ва сайлов жараёнининг шаффофлигига ҳам таъсир кўрсатиши эҳтимолдан холи эмас.

Жамоатчилик эса ҳозирча икки хил фикрга бўлинган: бир томонда буни оддий тасодиф ва ҳаётий ҳолат сифатида қабул қилаётганлар бўлса, иккинчи тарафда эса сиёсий сабаблардан гумон қилаётганлар бор. Ҳар ҳолда, воқеа Германия сиёсий ҳаётида катта муҳокамага айланди.