Ташиевдин убадасынан кийин Жайнак Немат уулу Нарынга мэр болуп дайындалды
Президент Садыр Жапаровдун 25-июлдагы тескемесине ылайык, Канболот Тутуев Нарын шаарынын мэри кызматынан бошотулду. Дагы бир тескемеси менен бул орунга Жайнак Немат уулу дайындалды. Ал буга чейин Ноокен районунда төрт жылдан бери акимдин орун басары болуп иштеп келген.
Апта башында Улуттук коопсуздук комитетинин төрагасы Камчыбек Ташиев аталган районго барганда Немат уулу менен сүйлөшкөн. Анда "же начар иштегенинен улам, же колдоочусу жоктугунан" бир жерде төрт жылдан бери отурганын айткан. Ошону менен катар эле Немат уулун өлкөнүн түндүк тарабына аким кылып жөнөтүүнү убада кылган.
Маалыматтарга караганда, Жайнак Немат уулу 46 жашта, Ноокен районунан акиминин орун басары болуп 2021-жылдан бери иштеп келе жаткан. Ага чейин Кочкор-Ата шаарынын вице-мэри болгон.