Қазақстанда тағы бір маңызды медициналық қызмет тегін болады

Қазақстанда тағы бір маңызды медициналық қызмет тегін болады, яғни мемлекеттік кепілдік берілген тегін медициналық көмек (ТМККК) пакетіне енгізіледі, - деп хабарлайды Tengrinews.kz тілшісі.
Денсаулық сақтау министрлігіне қарасты Республикалық бастапқы медициналық-санитариялық көмек орталығының директоры Айгүл Қасымованың айтуынша, екінші жартыжылдықтан бастап онкоскринингтерді кезең-кезеңімен ТМККК жүйесіне көшіру жоспарланып отыр, бұл оларды барлық мақсатты топтар үшін қолжетімді етеді.

"Қолға алынған шараларды ескере отырып, скринингтердің тиімділігі едәуір артады деп күтіледі. Жаңа тәсілдер ауруларды ерте анықтауға, өлім-жітімді азайтуға және алдын алуға негізделген, халықтың ұзақ мерзімді денсаулығына бағытталған денсаулық сақтау жүйесін қалыптастыруға ықпал етеді", – деді Қасымова ОКҚ брифингінде.

Кейінірек Денсаулық сақтау министрлігі бұл бұйрық биылғы қыркүйекте күшіне енетінін нақтылады. Осылайша, онкологиялық скринингтер міндетті әлеуметтік медициналық сақтандыру (МӘМС) пакетінен ТМККК-ға ауысып, қазақстандықтар үшін тегін болады. Яғни, онкологиялық тексерістен өту үшін енді сақтандыру қажет емес, бұл процедураны жай ғана емханада жоспарлы тексеру аясында өтуге болады.
Сілтемесіз жаңалық оқисыз ба? Онда Telegram желісінде парақшамызға тіркеліңіз!