Yandex Uzbekistan ўсмирлар учун Python бўйича курс очади

Yandex Uzbekistan 14 ёшдан 17 ёшгача бўлган ўсмирлар учун бепул Python дастурлаш онлайн-курсини бошлайди, деб Kursiv хабар берди. Компания матбуот хизматининг маълум қилишича, тингловчилар учун рўйхатдан ўтиш 15 августгача очиқ. Курсга дастлабки тайёргарлик талаб этилмайди ва дастурлашга қизиқиш билдирган ёшлар учун мўлжалланган.

Дарс дастурида Python асослари ва turtle визуал модулида ишлаш ўргатилади. Turtle орқали ёшлар код ёрдамида расм чизишни ва дастурлашни яхшироқ тушунишни ўрганади. Курс саккизта модулдан иборат бўлиб, тугатганларга сертификат берилади.

Курсни 20 августгача муваффақиятли якунлаган 120 нафар энг яхши ўқувчи Yandex’нинг дастурлаш мактабига танловсиз қабул қилинади ва улар учун кузда Python’нинг чуқурлаштирилган курси бошланади. Python 1991 йилда яратилган бўлиб, бугунги кунда энг машҳур дастурлаш тилларидан бири саналади.