Бўронли кўлда оғир йўқотиш: 8 киши ҳаётдан кўз юмди

АҚШнинг Калифорния штатида жойлашган машҳур Tahoe кўлида ўтган ой рўй берган кеманинг ағдарилиши оқибатида ҳалок бўлган 8 кишидан ҳеч бири ҳаётий жилет (қутқарув жилети) киймаган. Бу ҳақда АҚШ Миллий Транспорт Хавфсизлиги Кенгаши (НТСБ) дастлабки тергов хулосасида маълум қилди.

Ҳалокат 21-июн куни кучли ва кутилмаган бўрон вақтида содир бўлган. Воқеа вақтида 28 футли (8,5 метр) Chris-Craft маркали олтин рангли кема 10 футли (3 метр) тўлқинлар остида қолиб, ағдарилиб кетган. Кема бортида бўлган 10 кишидан 8 нафари ҳалок бўлган. Улар орасида туғилган кунини нишонлаётган тўрт кишилик бир оиланинг аъзолари ҳам бор эди.

Об-ҳаво кутилмаганда кескин ўзгарган
НТСБ ҳисоботига кўра, гуруҳ таҳминан соат 12:00 да кўлдан сузиб чиқиб кетганида об-ҳаво асосан тинч эди. Аммо икки соат ичида шамол кучайиб, тўлқинлар пайдо бўлди. Соат 14:30 атрофида кема қайтиб келаётганида дўл ёға бошлаган ва кема кучли тўлқинларга ён томони билан дуч келган.“Кема ичига сув кира бошлаган ва йўловчилардан баъзилари сувни ташқарига чиқаришга ҳаракат қилишган. Аммо катта бир тўлқин кемани тўлиғича ағдариб юборган,” дейилади расмий ҳисоботда.

Фақат иккита одам тирик қолган
Кема ағдарилганидан сўнг, икки киши дарҳол қутқарилган. Улардан бири ҳаётий жилет кийган бўлган, иккинчиси эса унга ёпишиб олган ҳолда омон қолган. Ҳалок бўлганларнинг ҳеч бири ҳаётий жилетда бўлмаган.

Қирғоқдаги сайёҳлар кема ағдарилганини кўриб, зудлик билан полицияга хабар берган. Кеманинг ўзидан эса ҳеч қандай фавқулодда сигнал юборилмаган.

Tahoe кўлида ҳалокатлар кам учрайди, лекин хавф ҳар доим мавжуд
Жанубий Tahoe полицияси лейтенанти Скотт Кривелли сўзларига кўра, ҳар йили Tahoe кўлида чўкиш ва бошқа бахтсиз ҳодисалар содир бўлади, бироқ бунчалик кўп қурбонлар билан боғлиқ кемага оид фожиалар камдан-кам учрайди. Одатда ҳар ёзда кўлда ўртача 6 киши ҳалок бўлади.