Бир ойда икки марта омад

Америкада яшовчи Тревис исмли эркак қисқа фурсат ичида иккинчи марта бир хил лотерея ўйинидан катта мукофотга эришди. Унинг фикрича, бу омад унга яхши иш қилгани туфайли кулиб боқди.

Арканзас штатида яшовчи Тревис С. (исми тўлиқ ошкор этилмаган) "Frenzy" номли лотерея ўйинида икки ҳафта фарқ билан икки марта 50 минг доллардан (тахминан 600 миллион сўм) ютиб олди. Бу ҳақда Pravilamag хабар берди.

Тревис бу ўйин учун ҳар бир чиптага 20 доллар (тахминан 250 минг сўм) сарфлаган. У биринчи ютуқни июл ойи бошларида қўлга киритган. Шу муваффақиятдан сўнг у иккинчи марта ютуқ чиқишига ишонмаган, бироқ ортидан икки ҳафта ўтиб яна омадини синаб кўрган.

«Мен ўша чиптадан яна ютаман деб ўйламагандим», — деб эслайди Тревис.

Унинг фикрича, бу катта ютуқ унга қилган эзгу амали эвазига насиб қилган. Яъни, у иккинчи чиптани сотиб олишдан олдин бегона инсонга ёрдам қўлини чўзиб, 100 доллар берган.

— «Бу яхши иш омадимни очди, деб ўйлайман»,— дейди Тревис.

У ютган маблағни керакли эҳтиёжларга сарфлашни режалаштирмоқда. Хусусан, у янги машина сотиб олиш ва ўгай қизига волейбол кроссовкаларини олиб бериш ниятида.