Кашкадарёда ҳайдовчи машинани тўхтатмоқчи бўлганларни судраб кетди

Кашкадарё вилояти Миришкор туманида юз берган воқеа ижтимоий тармоқларда кенг муҳокамаларга сабаб бўлди. 8 июль куни соат 14:30 атрофида рўй берган воқеада Nexia-3 автомобили ҳайдовчиси бир неча фуқарони ерда судраб кетган. Бу ҳақда вилоят Ички ишлар бошқармаси маълум қилди, деб UPL.uz ёзмоқда.

Маълумотларга кўра, Р.Л. ва К.С. исмли шахслар маҳаллий муассаса эгаси Э.И. билан ўзаро жанжаллашиб қолган. Жанжалдан сўнг Р.Л. ва К.С. Nexia-3 автомобилида ҳудудни тарк этмоқчи бўлган. Шу пайтда Э.И. ва унинг қариндошлари уларни тўхтатишга уринади. Бироқ ҳайдовчи ҳаракатни тўхтатмасдан автомобилни ҳайдай бошлаган ва одамлар машинанинг ҳаракатига монеълик қилишга уринаётган пайтда уларни судраб кетган.

Ҳайдовчи ҳодиса жойидан қочиб кетган. Ҳозирда Миришкор туман ИИБ томонидан текширув ишлари олиб борилмоқда. Барча иштирокчиларнинг ҳаракатларига ҳуқуқий баҳо берилади.