د عراق د کوت ښار په سوداګري مرکز کې پراخ اور لګېدلی
د عراق د ختیځ په کوت ښار کې روغتیايي چارواکو او د پولیسو دوو سرچینو پرون (جولای ۱۷مه) رویټرز ته ویلي، چې په یوه سوداګریز مرکز کې د پراخ اور د لګېدو له امله لږ تر لږه ۶۹ تنه مړه شوي او ۱۱ نور ورک دي.
په خپرو شویو تصویرونو کې ښکاري چې د مارکېټ د ودانۍ بهرنۍ برخه بشپړه سوځېدلې ده.
په هغو ویډیوګانو کې چې د دې پېښې له ځایه په ټولنیزو رسنیو کې خپرې شوې دي، لیدل کېږي چې د شپې په تیاره کې سترې لمبې پورته کېږي، د اور وژنې کارکوونکي د اور وژلو لپاره د اطفایې د موټرو په وسیله اوبه پاشي، او خلک هم د ژغورنې له ډلو سره مرسته کوي.
د کوت ښار یوه چارواکي، علي المیاحي، رویټرز ته ویلي: «نور مړي لا هم تر نړېدلو ځایونو لاندې پاتې دي.»
د دې اورلګیدو علت لا نه دی څرګند شوی، خو د پولیسو لومړنی راپور ښيي چې اور له هغه پوړ څخه پیل شوی و چې عطر او د سینګار وسایل پکې پلورل کېدل.
د کوت والي ویلي، د ودانۍ له څښتن او د پلورنځي له مسوولانو څخه قانوني شکایت شوی دی.