Экопартия дарахт кесиш мораторийини бекор қилишга қарши чиқди

Ўзбекистон Экологик партияси Murad Buildings девелоперлик компанияси раҳбари Мурад Назаровнинг Тошкент шаҳрида дарахт кесиш мораторийини бекор қилиш таклифига кескин эътироз билдирди. Бу ҳақда партия вакили, депутат Жавлон Абдуллаев расмий баёнот берди, деб Kursiv.media хабар берди.

Эслатиб ўтамиз, Назаров қурилиш ишлари вақтида дарахтлар ҳар ҳолда шикастланади ёки йўқ қилинади, деган фикр билдириб, уларни олдиндан экиш тизимини жорий этиш — "дарахтлар банки" ташкил этишни таклиф этган эди.

Бироқ Жавлон Абдуллаев ва Экопартия бу позицияни маъқулламади. Депутат таъкидлашича, глобал исиш ва сув етишмовчилиги шароитида ҳар бир етилиб улгурган дарахтнинг аҳамияти жуда юқори. Кatta дарахтни парваришлаб етиштириш учун ўнлаб йиллар ва катта ресурслар талаб қилинади.

Унинг таъкидлашича, мораторийнинг жорий этилиши бежиз эмас: охирги вақтларда сони ортиб бораётган ноқонуний кесиш ҳолатларига қарамасдан, ушбу чора туфайли 98% дарахтлар сақлаб қолинган. Жорий йилнинг биринчи ярмида ҳукумат дарахт кесиш бўйича 3,2 мингта аризани рад этиб, 453,2 мингта дарахтни, жумладан 86 мингдан ортиқ қимматли турларни сақлаб қолди.

Экологларнинг таъкидлашича, қайта экиладиган кўчатларнинг аксарияти илдиз отмайди ва қуриб қолади, бу эса “компенсацион экиш” усулининг самарадорлигини шубҳа остига қўяди.

«Биз аниқ айтамиз: ҳар қандай қурилиш, ривожланиш ва қайта қуриш ишлари экологик манфаатлар ҳисобидан эмас, балки улар билан мувозанатда олиб борилиши керак», — дейилади Экопартия баёнотида.