ტრამპს სურს მოქალაქეობა ჩამოართვას ტელეწამყვანს
აშშ-ის პრეზიდენტმა, დონალდ ტრამპმა 12 ივლისს განაცხადა, რომ შესაძლოა აშშ-ის მოქალაქეობა ჩამოართვას ტელეწამყვან როზი ო'დონელს - მას მერე, რაც ტელეწამყვანმა გააკრიტიკა ტრამპის ადმინისტრაციის რეაგირება ამინდის სააგენტოების პროგნოზზე ტეხასში მომხდარი, მსხვერპლის მომტანი წყალდიდობის წინ. ტრამპსა და ო'დონელს შორის დაპირისპირება მანამდეც იყო, სოციალური მედიით.
"იმ ფაქტის გამო, რომ როზი ო'დონელი არ პასუხობს ჩვენი დიადი ქვეყნის საუკეთესო ინტერესებს, მე სერიოზულად განვიხილავ მისთვის მოქალაქეობის ჩამორთმევას" - წერს ტრამპი თავისი სოციალური მედიით, Truth Social-ით, რაც მიემართება მისი ადმინისტრაციის მიერ გატარებულ პოლიტიკას, უცხოეთში დაბადებული, პროტესტის გამომხატველი პირების დეპორტაციის მცდელობებით.
"იგი საფრთხეა კაცობრიობისთვის და უნდა დარჩეს მშვენიერ ქვეყანა ირლანდიაში - თუკი მათ ასე სურთ. ღმერთმა დალოცოს ამერიკა!" - წერს ტრამპი.
აშშ-ის კანონით, პრეზიდენტს არ აქვს უფლება მოქალაქეობა ჩამოართვას ამერიკაში დაბადებულ პირს. ო'დონელი ნიუ-იორკის შტატშია დაბადებული.
როზი ო'დონელი - რომელიც უკვე დიდი ხანია ტრამპის მხრიდან თავდასხმების სამიზნეა - მიმდინარე წელს, ტრამპის პრეზიდენტობის მეორე ვადის დაწყების შემდეგ ირლანდიაში გადავიდა საცხოვრებლად, 12 წლის შვილთან ერთად. მარტში TikTok-ით გამოქვეყნებულ ვიდეოჩანაწერში ის ამბობს, რომ ამერიკაში მაშინ დაბრუნდება, "როცა იქ ყველა მოქალაქისთვის უსაფრთხო იქნება თანაბარი უფლებების ქონა".
ტრამპის ბოლო მუქარას ო'დონელმა უპასუხა ინსტაგრამზე გამოქვეყნებული ორი პოსტით - მისი თქმით, აშშ-ის პრეზიდენტი მას ეწინააღმდეგება იმიტომ, რომ ის განასხეულებს "იმ ყველაფრის საპირისპიროს, რასაც [ტრამპი] წარმოადგენს".
ტრამპის ადმინისტრაცია, ისევე, როგორც ადგილობრივი და სახელმწიფო მოხელეები, კითხვების სამიზნე არიან იმის თაობაზე, შეიძლებოდა თუ არა მეტის გაკეთება მოქალაქეების გაფრთხილებისთვის და დაცვისთვის ტეხასში მომხდარ წყალდიდობამდე - რომელიც ძალიან სწრაფად განვითარდა სახელმწიფო დღესასწაულზე, 4 ივლისს და იმსხვერპლა სულ მცირე 120 ადამიანი, მათ შორის ათობით ბავშვი.
ტრამპი პარასკევს ესტუმრა ტეხასს და დაიცვა თავისი ხელისუფლების ქმედებები - მისი თქმით, სააგენტოებმა "არაჩვეულებრივად იმუშავეს შექმნილ ვითარებაში".