Биткоин $135 мингга етиши мумкин — тахминлар
0
Экспертлар криптовалюта нархининг шиддат билан ўсишини АҚШда Дональд Трамп томонидан қабул қилинган солиқ имтиёзлари ва тадбиркорликни рағбатлантирувчи қонунлар билан боғламоқда.
Айни дамда биткоин нархи 12 июль ҳолатига кўра $118 минггача етиб, ўзининг тарихий энг юқори чўққисини янгилади. Умумий бозор қиймати эса $2,3 триллиондан ошиб, Google компаниясига қарашли Alphabet'ни ҳам ортда қолдирди.
Молия бозорлари таҳлилчилари бу ўсишга бир нечта омиллар туртки бўлаётганини айтишмоқда. Улар қаторида АҚШдаги ликвидлик даражасининг ортиши, фоиз ставкалари бўйича эҳтимолий юмшоқ сиёсат ва технология соҳасидаги ўсишни қайд этиш мумкин.
15 июль куни эълон қилиниши кутилган АҚШ инфляция кўрсаткичлари ва Федерал захира тизимининг муносабати ҳам криптобозорда муҳим аҳамият касб этади.
Cifra Markets ва Whitebird каби компаниялар биткоин нархи август охиригача $130–135 минг атрофида бўлишини кутишмоқда. Шунингдек, айрим таҳлилчилар йил якунигача $168 мингдан $184 минггача ошиб кетиш эҳтимолини ҳам истисно қилмаяпти.
Шу билан бирга, мутахассислар нархларда қисқа муддатли пасайишлар кузатилиши мумкинлигини таъкидламоқда. Аммо уларнинг фикрича, умумий ўсиш йўналиши ҳозирча ўзгармайди.