"Рома"да катта ўзгаришлар: Шомуродов ва Паредес кетмоқда

Италиянинг машҳур нашри "Corriere della Sport" хабарига кўра, "Рома" клуби ёзги трансферлар мавсумида аниқ стратегик йўналишга амал қилмоқда. Клуб раҳбарияти аввалги мақсад сифатида таркибни қисқартириш ва маошлар фондини енгиллаштиришни кўзлаган. Шу орқали улар келгусида Жан Пьеро Гасперини, Фредерико Массара ва Клаудио Раньери ўртасидаги муносабатлардан фойдаланиб, янги трансферлар учун имконият яратишни мақсад қилган.

Яқин кунларда клубни тарк этиши кутилаётган футболчилар орасида Элдор Шомуродов ва Леандро Паредес алоҳида тилга олинмоқда. Уларнинг ҳар иккиси ҳам жамоадаги фаолияти якунланиши арафасида турибди.

Элдор Шомуродовга катта қизиқиш билдирган клуб — Туркиянинг "Истанбул Башакшеҳир" жамоаси. Манбаларга кўра, трансфер битими 7-8 миллион евро атрофида бўлиши мумкин. Бу сумма "Рома" учун катта аҳамиятга эга, чунки 2021 йили у "Женоа"дан 17 миллион евро эвазига сотиб олинган эди. Агар бу битим амалга ошса, клуб унинг харид нархини қисман бўлса ҳам қоплаш имконига эга бўлади.

Шомуродовнинг Римдаги фаолияти кутилмаганда юқори нотада бошланган эди. Клаудио Раньери қўл остида у асосий таркибда мунтазам ўйин оладиган футболчига айланган ва хорижий клубларнинг диққат марказига тушган. У, шунингдек, Ўзбекистон миллий терма жамоасининг етакчиси сифатида Жаҳон чемпионатига йўлланма олишда муҳим рол ўйнаган. Шунга қарамай, энди Элдорнинг Римдаги сўнгги кунлари саноқли бўлиши мумкин. Эслатиб ўтамиз, бу Шомуродовнинг трансфери атрофидаги илк миш-мишлар эмас: қишда у "Венеция" клубига ўтишга яқин бўлган, ёзда эса АҚШнинг MLS лигасидаги "Атланта" клубига ўтиши мумкинлиги ҳақида хабарлар тарқалган эди.

Ярим ҳимоячи Леандро Паредес ҳам жамоани тарк этиши арафасида. Аргентиналик футболчи аслида "Бока Хуниорс" клубининг тарбияланувчиси бўлиб, ҳозирда айнан шу клубга қайтишга яқин турибди. Ушбу трансферда муҳим омил — клуб президенти Хуан Роман Рикелме бўлмоқда. Рикелме шахсан Паредесга таклиф берган ва натижада у 2 миллион евро маошга эга бўлган 3 йиллик шартномага рози бўлган.

Маълумотларга кўра, Паредес ва "Рома" ўртасидаги амалдаги шартномада Буэнос-Айрес клубига ўтиш учун махсус модда бор — у тахминан 3 миллион евро компенсация асосида амалга оширилади. Бу орқали футболчи эркин тарзда "Бока"га қайтиш имконига эга бўлади.

Шу тариқа, "Рома"нинг ёзги трансфер сиёсати жамоани қайта шакллантириш, ёш ва самарали футболчиларни жалб қилишга йўналтирилган кўринади. Шомуродов ва Паредеснинг кетиши эса бу жараёндаги муҳим қадамлардан бири сифатида баҳоланмоқда.