Эрон АҚШга нота топширди: Трамп таҳдидлари ортида сиёсий таранглик
0
Таҳлилчилар фикрича, бу сиёсий хат Трампнинг сўнгги баёнотлари фонида икки давлат ўртасидаги тарангликни янада кучайтириши мумкин. Теҳрон, АҚШ президенти Доналд Трампнинг чиқишларини “провокацион ва таҳдидли” деб баҳолади. Эронлик расмийлар таъкидлашича, Америка раҳбарининг сўзлари халқаро ҳуқуқ меъёрлари ва БМТ Низомига зид бўлиб, минтақа хавфсизлиги учун жиддий хатарларни вужудга келтиради.
Расмий баёнотда айтилишича, АҚШ ҳукумати Исроилнинг Эронга қарши ҳарбий ҳаракатларида фаол шериклик қилмоқда. Бу эса Вашингтоннинг ишончли ва нейтрал сиёсат юритаётганига шубҳа туғдиради. Эрон томони бу ҳолатни халқаро ҳуқуқ бузилиши, деб баҳолаб, Швейцария элчисидан нотани зудлик билан АҚШ раҳбариятига етказишни талаб қилди.
Маълумот учун, АҚШ билан дипломатик муносабатлар 1980 йилда, Теҳрондаги Америка элчихонасида юз берган гаровга олиш воқеасидан кейин тўхтаган. Ҳозирги кунда АҚШ манфаатларини Эронда айнан Швейцария элчиси ифодалайди ва икки давлат ўртасидаги барча расмий ахборот алмашинуви шу орқали амалга оширилади.
Трампнинг 18 июнь кунги баёнотлари эса вазиятни янада кескинлаштирди. АҚШ президенти Эронга “сўнгги ултиматум”ни эълон қилганини ва Теҳрон “сўзсиз таслим бўлиши” кераклигини қайта-қайта таъкидлади. Шу билан бирга, Америка етакчиси ўз баёнотида Қўшма Штатлар Эроннинг ҳаво ҳудудини тўлиқ назорат қилиши ва мамлакат олий раҳбари Али Хоминаийнинг жойлашувидан хабардор эканини айтди.
Журналистлар ядровий иншоотларга зарба бериш эҳтимоли ҳақида сўраганда, Трамп: “Мен буни қила оламан, ёки қилмаслигим ҳам мумкин”, деган таҳдидли ва ноаниқ жавоб қайтарди.
Мухлислар ва таҳлилчилар таъкидлашича, бундай кескин сиёсий баёнотлар АҚШ–Эрон муносабатларидаги тарангликни янада авж олдириши, минтақада хавфсизлик ва барқарорлик учун янги синовлар юзага келтириши мумкин.