Флорида губернатори: «Хавф туғдирган намойишчиларни машина билан босиб ўтсангиз, айб сизда эмас»

АҚШда кенг жамоатчилик эътиборини тортган баҳсли баёнот юз берди. Флорида штати губернатори Рон ДеСантис ток-шоу давомида чиқиш қилиб, хавфли вазият юзага келганда, фуқаролар ўз ҳаётини ҳимоя қилиш мақсадида намойишчиларни машина билан уриб юборишга ҳақли эканини маълум қилди.

Губернаторнинг таъкидлашича, у шундай ҳолатлар ҳақида гапирмоқдаки, унда намойишчилар йўлни тўсиб, автомобиллар ҳаракатини чеклайди ва ҳайдовчига таҳдид солади. ДеСантисга кўра, агар намойишчи фуқаронинг ҳаракатланишига тўсқинлик қилиб, у шахс ўзини ҳимоя қилиш мақсадида машинани ҳаракатга келтирса, бу ҳолатда айблов намойишчига юкланиши керак.

«Агар кимдир машинангизни ўраб олса ва сиз ундан чиқиб кетиш учун ҳаракат қилсангиз, бу ўзини хавф остига қўйган намойишчининг масъулияти ҳисобланади», — деди ДеСантис ток-шоу бошловчиси Дейв Рубин билан суҳбатда.

Бу сўзлар 14 июнь куни – АҚШнинг собиқ президенти Доналд Трампнинг туғилган кунида ўтказилиши режалаштирилган оммавий намойишлар арафасида янгради. «Қироллар йўқолсин» шиори остида ташкил этилаётган акция мамлакат бўйлаб тарқалиб, норозилик ҳаракатларини кучайтириши кутилмоқда.

CBS телеканали тарқатган маълумотларга кўра, ушбу тадбир «миллий итоатсизлик куни» сифатида эълон қилинган ва аҳоли «шафқатсизлик, коррупция ва авторитаризмга қарши» ҳаракатда бирлашишга чақирилмоқда.

Бундан аввалроқ, 6 июнь куни Лос-Анжелес шаҳрида Трампнинг иммиграция сиёсатига қарши намойишлар бошланди. Намойишлар полиция билан тўқнашувга айланди ва натижада ҳукумат Миллий гвардия аскарларини юборишга мажбур бўлди.

Ҳозирча ДеСантиснинг ушбу баёноти АҚШдаги фуқаролик жамияти ва ҳуқуқни муҳофаза қилиш ташкилотлари орасида кескин мунозараларга сабаб бўлмоқда. Қатор ҳуқуқшунослар ва фаоллар унинг сўзларини фуқароларни зўравонликка ундаши мумкин, дея баҳоламоқда. Шу билан бирга, унинг тарафдорлари губернаторнинг шахсий хавфсизлик масаласидаги қатъий позициясини қўллаб-қувватламоқда.