Қозоғистонда Starlink сунъий йўлдош интернети расман ишга тушади
0
Шу вақтгача Starlink республикада асосан синов режимида, айрим мактабларда интернетни таъминлаш учун ишлатиб келинган, аммо оддий аҳоли учун расман очиқ бўлмаган эди. Янги келишув натижасида, чекка қишлоқлар, тиббиёт муассасалари, мобил бригадалар ва инфратузилма объектлари, хусусан, оптик толали интернетни ўрнатиш мураккаб ёки иқтисодий жиҳатдан ноқулай бўлган ҳудудлар ҳам юқори сифатли ва тезкор алоқадан баҳраманд бўлади.
Маълумотларга кўра, Starlink хизматига уланиш учун фойдаланувчиларга махсус терминаллар — сунъий йўлдош антеннаси ва қабул қилувчи қурилма зарур бўлади. Вазирлик хизмат кўрсатиш шартлари ҳозирча муҳокама жараёнида эканини маълум қилди, бироқ барча техник ва ҳуқуқий масалалар ҳал этилгандан сўнг, фуқаролар учун қонуний ва осон йўл билан сунъий йўлдош интернети очиқ бўлади.
Starlink — дунёдаги энг инновацион интернет лойиҳалардан бири. SpaceX томонидан 2015 йилда бошланган ушбу глобал ташаббуснинг асосий мақсади Ер шаридаги ҳар қандай чекка, ноқулай ёки алоқа етишмайдиган ҳудудларни юқори тезликдаги интернет билан таъминлашдир. Лойиҳа доирасида минглаб кичик сунъий йўлдошлар фазога учирилган ва улар орқали фойдаланувчилар интернетга уланади.
Қозоғистонда Starlinkнинг тўлиқ ишга туширилиши мамлакат инфратузилмаси ва таълим, тиббиёт, бизнес соҳалари учун катта салоҳият яратади. Энди кўп йиллар мобайнида алоқа етишмайдиган чекка қишлоқлар ҳам замонавий технологиялар оламига қадам қўяди. Мутахассислар бу аҳоли ҳаёти сифатини яхшилаш, давлат хизматларини электрон форматда кўпайтириш ва инновацияларни ривожлантиришда катта қадам бўлади, деб ҳисоблашмоқда.
Шундай экан, 2025 йилдан Қозоғистонда ахборот замонавий ва тезкор усулда тарқаладиган янги давр бошланади. Starlink глобал тизимига уланиш мамлакат рақамли тараққиётига янги суръат бахш этади!