Қошанов: Көшбасшыларымыздың берік достығы түркі елдерін жұмылдыра түсті
Жиынға Қазақстан, Әзербайжан, Қырғызстан, Түркия, Өзбекстан және Солтүстік Кипр Түрік Республикасының Парламент төрағалары қатысты.
Алдымен тараптар Ассамблея Кеңесінің отырысында бас қосып, Әзербайжан Республикасы Милли Меджлисінің төрайымы Сагиба Гафарова ТүркПа-ға Әзербайжанның төрағалық еткен кезеңде атқарылған жұмысты қорытындылады. Сонан соң Әзербайжан тарапы төрағалық тізгінді Қазақстанға тапсырды.
Одан әрі талқылау ТүркПА-ның жалпы отырысында жалғасты. Жиынды ашқан Мәжіліс төрағасы Ерлан Қошанов түркі мемлекеттерін бүгінде терең тарихи тамыры ғана емес, сонымен қатар мемлекет басшылары арасындағы берік достық, ортақ мүдделер мен мығым мәдени байланыс біріктіріп отырғанын атап өтті.
"Қазір түркі жұртының көші ілгері. Өзара татулық пен түсіністіктің арқасында елдеріміз өркендеп келеді. Бұл – ең әуелі біздің мемлекеттеріміздің басшылары жүргізіп отырған байыпты саясаттың нәтижесі. Президенттеріміз түркі интеграциясы бағытында орасан жұмыс атқарып жатыр. Әлемдегі геосаяси ахуал мың құбылып тұрғанына қарамастан, түркі елдері өсу мен өрлеудің құбыласынан, дамудың даңғыл жолынан жаңылған жоқ", – деді Палата спикері.
Ерлан Қошанов түркі парламенттерінің мақсат-міндеттері ауқымды екенін айтты.
"Біздің парламенттеріміз де елдеріміздің ынтымағын тереңдетуге күш салып отыр. Аманат арқалаған депутат ретінде халықтарымыздың ниеті мен арман-мұратын жақсы білеміз. Әрине, ең әуелгі мақсатымыз – көшбасшыларымызға тірек бола отырып, тағдыршешті шешімдерді заңнамалық тұрғыда қолдау. Дегенмен Парламент заң қабылдайтын институт қана емес. Ол – ұлттарымызды ұйыстыратын, елдерімізді жақындастыратын, заңнамаларымызды үндестіретін алтын көпір. Біздің басты әрі тарихи миссиямыз осы деп ойлаймын", – деді Палата спикері.
Ассамблеяда Құқықтық мәселелер және халықаралық қатынастар, Білім, мәдениет, әлеуметтік және гуманитарлық мәселелер, Экономикалық ынтымақтастық туралы және Қоршаған орта, табиғи ресурстар және денсаулық сақтау жөніндегі комиссиялардың есебі мен ұсынымдары қабылданды.
Суреттер: Мәжілістің баспасөз қызметі/Ж.Жұмабеков, Т.Таныбаев
Бұдан бөлек "ТҮРКПА-ға мүше мемлекеттерде тұруға рұқсат беруді жеңілдету туралы", "Мұғалімнің мәртебесі туралы", "Экономикалық қызметтегі таза энергия туралы", "Халыққа экологиялық білім беру және ағарту туралы" модельдік заң жобаларын қабылдады.
Жалпы отырыста ТүркПа-ның келесі XV басқосуын Қырғыз Республикасында өткізу туралы шешім шығарылып, Астана декларациясы қабылданды.