Алмазбек Атамбоев Халқаро судда муҳокамага тайёрлигини маълум қилди!

Қирғизистон собиқ президенти Алмазбек Атамбоев ўзига нисбатан илгари сурилган барча айбловларни рад этиб, ўз ҳақиқатини исботлаш учун халқаро трибунал олдида судланишга тайёрлигини билдирмоқда. Бу ҳақда у ижтимоий тармоқлардаги шахсий саҳифасида эълон қилди.

Атамбоевга кўра, мамлакатнинг амалдаги президенти Садир Жапаров уни кўплаб оғир жиноятларда, жумладан коррупция, ўғирлик ва ҳатто қотилликда ҳам айблаган. Шунингдек, Жапаров айни пайтда собиқ президентнинг иши бўйича очиқ суд жараёнини ўтказишдан хавфсираб келаётгани ҳақида баёнот берганди.

Шундан сўнг, Алмазбек Атамбоев ўзига қўйилган айбловлар бўйича очиқ суд жараёнини ўтказишни таклиф қилиб, расмий ҳокимият вакилларига аниқ бир қадам ташлашни таклиф этмоқда:

“Агар ҳукумат ҳақиқатни излаётган ва адолат ўрнатишни истайдиган бўлса, Рим статутини тасдиқлаб, Халқаро судга мурожаат қилиш керак. Мен шахсан ушбу халқаро трибунал олдида жавоб беришга тайёрман. Ҳатто Халқаро суд менинг айбимни тасдиқлаб, жазога маҳкум этадиган бўлса, панжара ортида қанча муддат бўлмасин ўтиришга тайёрман”, дейди собиқ президент.

Шунингдек, Атамбоев мамлакат раҳбариятига мурожаат қилиб, Қўй-Тош воқеалари бўйича айбланган ва қамоқхоналарда сақланаётган барча кишиларни зудлик билан озод қилиш кераклигини таъкидлади. Унга кўра, ушбу шахслар ҳеч қандай айбсиз ва ноҳақ равишда қамоқда сақланмоқда. Улар ҳақиқат учун, адолатли Қирғизистонни орзу қилгани учун жазоланган деб ҳисоблайди собиқ президент.

“Қўй-Тош воқеалари билан боғлиқ жараёнлар уйдирма бўлиб, у билан боғлиқ одамларни озод қилиш мамлакат раҳбарияти учун ҳам, халқ учун ҳам шараф иши бўлади. Буларнинг қамоқхоналарда туриши давлат раҳбарияти учун катта шармандаликдир”, деб ёзган Атамбоев.

Эслатиб ўтамиз, Қирғизистонда 2019 йилнинг 7-8 август кунлари собиқ президент Алмазбек Атамбоевни куч билан ҳибсга олишга уринишлар чоғида мамлакат тарихидаги энг жиддий тўқнашувлардан бири содир бўлган эди. Бишкек яқинидаги Қўй-Тош қишлоғидаги Атамбоев уйига Миллий хавфсизлик давлат қўмитасининг махсус бўлинмаси “Альфа” томонидан штурм амалга оширилган. Мазкур воқеалар давомида бир аскар қурбон бўлган, икки юздан зиёд одам турли даражада жароҳатланган.

Ўша куни Атамбоев тарафдорлари билан махсус кучлар ўртасида қуролли тўқнашув юз берган. Тарафдорлари Атамбоевни ҳимоя қилишга уриниб, махсус кучлар ходимлари билан қаттиқ жангларга киришган эди. Оқибатда, ҳуқуқ-тартибот идоралари ходимларидан кўплаб киши оғир жароҳатлар билан касалхонага ётқизилганди.

Шунинг ортидан Бишкек суди собиқ президент Алмазбек Атамбоевни мол-мулкини мусодара қилиш билан бирга сиртдан 11 йилу 6 ой муддатга қамоқ жазосига маҳкум этган. Шунингдек, суд жараёнида унинг ёнида бўлган яна бир нечта юқори лавозимли амалдорлар ҳам узоқ муддатли қамоқ жазоларига маҳкум қилинган эди.

Ҳозирги кунда мамлакатнинг амалдаги раҳбарияти билан собиқ президент ўртасидаги тортишувлар жамоатчилик эътиборини янада орттирмоқда. Атамбоев, халқаро трибунал олдида адолат ўрнатилишига ишонч билдириб, ўз ҳақиқати учун охиригача курашишга қарор қилганини айтмоқда. Унинг ушбу мурожаати мамлакатдаги сиёсий вазиятни янада кескинлаштириши мумкинлиги тахмин қилинмоқда.

Ҳозирча ҳукумат вакиллари Атамбоевнинг халқаро суд олдидаги муҳокама таклифига расман жавоб бермаган. Аммо сиёсий доиралар ва оммавий ахборот воситаларида бу ҳолат бўйича қизғин мунозаралар бошланган. Бу эса Қирғизистоннинг сиёсий ҳаётида янги босқич бошланишини кўрсатмоқда.