Трампга бобосидан хотира: Меркел ҳужжат топширди, Шолтс таклиф берди

Оқ уйда бўлиб ўтган матбуот анжуманида Германия канцлери Олаф Шолтс АҚШ президенти Доналд Трампга кутилмаган совға тақдим этди. У Трампнинг бобоси — Фридрих Трампнинг туғилганлик ҳақидаги гувоҳномаси нусхасини олиб келган. Ҳужжат немис ва инглиз тилларида бўлиб, унда Фридрих Трампнинг 1869 йилда Германиянинг Каллштадт қишлоғида дунёга келгани қайд этилган.

Маълумотларга кўра, Трампнинг бобоси 16 ёшида Америкага кўчиб ўтган, у ерда исмини Фредерик Трамп деб ўзгартирган ва Клондайкдаги олтин изловчилар яшовчи ҳудудда меҳмонхона очиб, катта бойликка эга бўлган.

Доналд Трамп эса бу борада кўп гапирмайди. У кўпроқ онасининг шотланд миллатига мансублигини тилга олади, аммо отасининг томони — айниқса немис илдизлари ҳақида деярли лом-мим демайди.

Шолтс нафақат ҳужжат тақдим этди, балки АҚШ президентини ўз бобосининг ватани — Каллштадтга ташриф буюришга ҳам таклиф қилди. Қизиқ томони шундаки, илгари собиқ канцлер Ангела Меркел ҳам Трампга айнан шундай таклиф билан чиққан эди, бироқ ўша вақтда бу ташриф амалга ошмаган.

Бу сафар ҳам Трампнинг ушбу таклифга қандай жавоб бериши ҳозирча номаълум. Бироқ немис томони АҚШ президенти ўз илдизларига назар ташлаб, тарихий боғланишни жонлантиришига умид билдирмоқда.