Россияда мигрантлар учун пенсияни бекор қилиш таклиф қилинди
0
Маълумотларга кўра, мазкур ташаббус ЛДПР партияси депутатлари, хусусан партия етакчиси Леонид Слуцкий раҳбарлигида илгари сурилган. Қонун лойиҳасида хорижий фуқароларга ижтимоий пенсия тайинлаш ва тегишли тўловларни бекор қилиш таклиф қилинган.
Ҳозирда амалдаги қонунчиликка кўра, Россияда доимий яшовчи ва камида 15 йил яшаган, яшаш гувоҳномасига эга бўлган, эркаклар учун 70 ёш ва аёллар учун 65 ёшга тўлган хорижий фуқаролар пенсия олиш ҳуқуқига эга. Бундан ташқари, пенсияга федерал ва минтақавий қўшимча тўловлар ҳам белгиланган.
Депутатларнинг таъкидлашича, Россия пенсия олиш имконияти туфайли кўплаб хорижликлар учун жозибали мамлакатга айланган. Бироқ, бугунги кунда ўртача пенсия миқдори ўртача иш ҳақининг бор-йўғи 28 фоизини ташкил этиб, нафақа иш ҳақининг учдан бир қисмини ҳам қопламаяпти. Бу эса Россияда пенсия даражасининг жуда пастлигидан далолат беради.
Ташаббус муаллифлари ушбу чора пенсия тизимини асоссиз ижтимоий мажбуриятлардан ҳимоя қилиш, давлат бюджетига тушаётган юкни камайтириш ва "Пенсия — давлат ҳаётида иштирок этиш натижасидир, формал яшаш эмас" тамойилига ишончни тиклашга ёрдам беради, деб ҳисоблашмоқда.