Дастин Штольцфус - Нурсултон Рўзибоев. Машҳур сайтлар жанг натижасини тахмин қилди

Ҳабарингиз бор, 17 майдан 18 майга ўтар кечаси соат 01:00 (Ўзбекистон вақти билан) АҚШда “UFC Fight Night 256” турнирининг навбатдаги жанглари старт олади. Унда юртимиз шарафини ҳимоя қилувчи ММА жангчиси Нурсултон Рўзибоев ўзининг навбатдаги жангини ўтказади. Унинг рақиби — америкалик Дастин Штольцфус бўлади.

Баъзи машҳур спорт таҳлилчилари ва нашрлар бу жанг бўйича ўз прогнози ва таҳлилларини тақдим этишди. Уларга кўра, жанг эрта якун топиши эҳтимоли юқори.

“MMA Fighting”: Нурсултон партерда устун бўлади

Ушбу нашрнинг таҳлилида Рўзибоевнинг партердаги устунлигига урғу берилган. Мутахассислар, Нурсултон рақибини ерга йиқитиб, у ерда зарбалар ёғдириш ёки сабмишн (таслим этувчи усул) билан ғалабага эришишини тахмин қилишмоқда.

“The Stat Zone”: статистика Рўзибоевни кўрсатмоқда

Бу нашр эса рақибларнинг умумий натижаларини таҳлил қилган ҳолда, Рўзибоевнинг 77 сонияда Брунно Феррейрани нокаут қилганини, Штольцфус эса айнан шу рақибдан мағлуб бўлганини эслаб ўтади. Уларга кўра, жанг муддатидан олдин тугаши эҳтимоли катта ва ғалаба ўзбекистонлик спортчи томонида бўлади.

“Clutch Points”: зарба кучи ҳал қилувчи бўлади

Бу манба эса, Штольцфус жангда эрта назоратни қўлга кирита олмаса, кучли зарбалари билан танилган Рўзибоев бу имкониятдан фойдаланиб, жангни ўз фойдасига якунлаши мумкинлигини ёзмоқда.

Zamin.uz таҳририятидан:
Нурсултон Рўзибоевнинг UFC'даги иккинчи жангини барча ўзбекистонлик спорт мухлислари интиқлик билан кутмоқда. Унинг ҳар бир чиқиши нафақат шахсий карьераси, балки юртимиз ММА салоҳиятини намоён этади. 256-турнирдаги натижа эса Рўзибоевнинг UFC’dagi келажак режаларига жиддий таъсир қилиши мумкин.

Сизчи, Нурсултон бу сафар ҳам жангни эрта якунлай оладими?