მამუკა მდინარაძე: „ან ჯიმ რიში გაემიჯნება პოლიტიკურ წარსულს, ან გამყარდება ეჭვი, რომ „დიპ სტეიტი“ კვლავ ინარჩუნებს პოზიციებს“

„ქართული ოცნების“ საპარლამენტო უმრავლესობის ლიდერი, მამუკა მდინარაძე სოციალურ ქსელ ფეისბუკში გამოეხმაურა საერთაშორისო მედიაში გავრცელებულ ინფორმაციას, რომლის მიხედვითაც, აშშ-ის პრეზიდენტი დონალდ ტრამპი მხარს უჭერს აიდაჰოს სენატორ ჯიმ რიშს მომავალი წლის შუალედური არჩევნების წინ.

მამუკა მდინარაძე ამბობს, რომ სენატორი ჯიმ რიში გამოირჩეოდა „დიპ სტეიტის“ აგენტურის განსაკუთრებული მხარდაჭერით.

„გუშინდელი „ნაცური“ აღტყინების მთავარი საფუძველი ტრამპის მიერ აიდაჰოს შტატის არჩევნებში რესპუბლიკელი ჯიმ რიშის მხარდამჭერი განცხადება გახდა. ბუნებრივია, ტრამპი დემოკრატს არ დაუჭერდა მხარს. თუმცა ობიექტურობისთვის ისიც უნდა აღინიშნოს, რომ სენატორი რიში სულ გამოირჩეოდა „დიპ სტეიტის“ აგენტურის განსაკუთრებული მხარდაჭერით და თავად – „დიპ სტეიტის“ ე. წ. ნარატივის გახმოვანებით. შესაბამისად, სამომავლო დაშვება მხოლოდ ორი შეიძლება იყოს: ან ჯიმ რიში მკაფიოდ გაემიჯნება თავისივე პოლიტიკურ წარსულს (სხვათა შორის, ტრამპის გაპრეზიდენტების შემდეგ ნამდვილად იკავებს თავს ჩვენზე თავდასხმებისგან), ან გამყარდება სამწუხარო ეჭვი, რომ „დიფ სთეითი“ კვლავ ინარჩუნებს თავის პოზიციებს. საქართველოს და ქართული საზოგადოების ერთ-ერთი მთავარი იარაღი სიმართლეა, რომელზეც ყოველთვის საქმის კურსში უნდა ვიყოთ“, – დაწერა მამუკა მდინარაძემ.

„სენატორი ჯიმ რიში უზარმაზარ საქმეს აკეთებს, წარმოადგენს აიდაჰოს შესანიშნავს ხალხს — შტატს, რომელიც მე მიყვარს და დიდი გამარჯვება მოიპოვა 2016, 2020 და 2024 წლებში!“, — დაწერა დონალდ ტრამპმა, რომლის თქმითაც, სენატის საგარეო ურთიერთობათა კომიტეტის თავმჯდომარე, რიში დაუღალავად იბრძვის „ამერიკის უპირველეს ყოვლისა“ დღის წესრიგისთვის.