ГIалгIайчохь полисхо хиллачу кхаанна таIзар дина курхаллаш а, талораш а лелорна
Иштта баьхна уьш чинех, царна дихкина бакъоларйаран органашкахь кхаа шарахь белхаш бар, хаамбина пачхьалкхан хаамийн "Интерфакс" агенталло регионерчу къайлахчу серсивийн урхаллина тIетевжина. ТаIзар динчийн цIераш, цара белхаш бинчу чоьхьарчу гIуллакхийн дакъойн цIераш а йохуш йац зорбанехь.
Бехкбуьллучийн версица, стохка охан-баттахь полисхоша декхаре винера меттиагера вахархо 70 эзар сом шайна дала, цо наркотикаш лелош йуй хьажа тоьшалла дан дIа ца вуьгург. Кхечу гIуллакхехь а цара оцу кепара бархI эзар сом даьккхинера вахархочуьнгара. Оццу баттахь Малгобекан кIоштара стационаран ДПС-н постана хьалха массарна а гуш цара лачкъийра цхьана стеган 250 эзар сом. Цул совнах, талламаш бечу заманчохь цхьана полисхочуьнгара схьайаьккхина 0,8 грам героин.
Дахначу кIиранах ГIалгIайчохь лецира ши полисхо, шайгарчу бакъонна тIехваларна а, наркотикаш лелош хиларна а. Талламан комитетан хаамашца, цара наркотикаш тийсинера меттигерчу вахархочунна, цул тIаьхьа цунна дуьхьал гIуллакх даьккхинера.
Гезгамашин-баттахь ГIалгIайчуьра Магасан кхело бехкевира патрулан-постан взводан хилла командир Мержоев Амиран йеттарна лаьцначунна – МВД-н пенсхочунна-заьIапхочунна. Мержоевна чохь даккха диъ шо тоьхна, бакъоларйаран органашкахь белхаш бан кхаа шарна дехка а доьхкуш. Официалехь тIечIагIбазчу хаамашца, Мержоевс а, цуьнан белхан шина накъосто а волайнхочуьнгара 400 эзар сом ахча даккха гIоьртина хиллера, цуьнгара наркотикаш йаьхча протокол ца хIотториг. Ахча деллерацо, ткъа наркотикаш тарлора полисхоша цунна кхийсина.