Павел Баркоўскі пра фестываль PRADMOVA
Беларускі фестываль інтэлектуальнай кнігі PRADMOVA у грузінскім Батумі сёння пачынае сваю працу. Фестываль запускае чатыры пляцоўкі па-за межамі Беларусі. Мерапрыемствы пройдуць у Батумі, Варшаве, Вільні і Беластоку.
Са старшынёй аргкамітэту фестывалю Паўлам Баркоўскім паразмаўляў Алесь Аркуш:
РР: Наколькі складана праводзіць фестываль PRADMOVA за мяжой?
– Натуральна, што за мяжой праводзіць фестываль складаней, чым дома, у любым выпадку. Але дапамагаюць тыя беларусы ў краінах, дзе мы ладзім фестываль. Звычайна гэта тыя краіны, дзе найбольшая дыяспара. Таму Польшча, Літва, Грузія – гэта тыя краіны, дзе мы доўгі час ладзім свае мерапрыемствы. Канешне больш складанасцяў, гэта нават геаграфічна нават складана, бо часам адну краіну ад другой аддзяляюць тысячы кіламетраў. Тым не менш мы заўсёды пакладаемся на мясцовыя рэсурсы творцаў, якія знаходзяцца ў гэтых краінах. Мы даем ім магчымасць выступіць, аб’яднацца, рабіць штосьці супольнае. З іншага боку спрабуем туды прывозіць тых людзей, якія знаходзяцца ў іншых краінах, каб усё ж такі беларусы не былі ізаляваныя адзін ад аднаго, каб усё ж такі культурніцкі абмен паміж намі адбываўся. Плюс мы заўсёды стараемся ангажаваць мясцовыя супольнасці: грузінскія, польскія, літоўскія, каб адбываўся міжнацыянальны абмен.
РР: Ці штосьці змянілася ў фестывалі?
– Часам наракаюць на тое, што наша назва гучыць вельмі пафасна – фестываль інтэлектуальнай кнігі. Магчыма не ўсе кнігі ці аўтары, якія з’яўляюцца на фестывалі, адпавядаюць гэтым высокім планкам. Але мы з пачатку паставілі сабе за мэту, што мы не з’яўляемся арбітрамі, якія вызначаюць, якія кнігі інтэлектуальныя, а якія не. Мы хутчэй працуем над тым, каб агульны ўзровень кніжнай культуры ў Беларусі павышаўся, каб аўтары сустракаліся са сваімі чытачамі, з рэдактарамі, з крытыкамі. Каб усе, хто ўдзельнічае ў стварэнні кніг, яны разумелі, што кніга гэта не толькі забаўка, не толькі тое, што можа прынесці нейкія грошы. Кніга – гэта тое, што працуе на людзей, на іх ідэнтычнасць, тое што вучыць іх думаць, то што стварае іх светапогляд. Таму ад таго, наколькі разумная кніга будзе ў беларусаў, настолькі залежыць будучыня нашай нацыі.
РР: У якой стадыі зараз падрыхтоўка да гэтага фестывалю? Наколькі ён гатовы?
– Як прынята казаць на 90%. Фестываль ужо абвясціў даты – гэта з 30-га верасня па 30 кастрычніка. Гэта чатыры гарады, адна анлайн-пляцоўка. Усе гэтыя даты пазначаны на нашым сайце pradmova.eu. Гэта практычна ўсе ўік-энды ў кастрычніку месяцы. Адпаведна амаль усе пункты праграмы ўжо можна знайсці і прачытаць у нашых сацсетках ці на нашым сайце. Адзінае, што да апошняга могуць быць нейкія змены, хтосьці можа захварэць, штосьці адмяніцца, але агулам на 90% праграма гатовая. Можна выбіраць, што хочацца наведаць.
Сёлетні фестываль прысвечаны пошуку будучыні для беларускай культуры. Сярод яго ўдзельнікаў вядомыя беларускія літаратары і дзеячы культуры, а таксама пісьменнікі і інтэлектуалы з усяго свету, якія далучацца да падзеі афлайн і анлайн, каб абмеркаваць актуальныя выклікі і надзённыя праблемы, што стаяць перад беларусамі сёння.
Беларускае Радыё Рацыя
Artykuł Павел Баркоўскі пра фестываль PRADMOVA pochodzi z serwisu БЕЛАРУСКАЕ РАДЫЁ РАЦЫЯ.