Ապահովեցի՞ք ՀՀ տարածքային ամբողջականությունը, կասեցրեցի՞ք բոլոր այն հնարավոր սպառնալիքները, որոնք այսօր գոյացած են ՀՀ-ի առջև․ պատգամավորը՝ Փաշինյանին
Կառավարության հետ հարցուպատասխանի ժամանակ «Հայաստան» խմբակցության պատգամավոր Աննա Գրիգորյանը ՀՀ վարչապետ Նիկոլ Փաշինյանին հարցեր ուղղեց Հայաստանի անվտանգության, Արցախի հարցով բանակցությունների մասին։
«2022 թվականին Պրահայում ընդունեցիք մի հայտարարություն, որով ոչ միայն իջեցրեցիք Արցախի կարգավիճակի նշաձողը, այլ ուղղակի ոչնչացրեցիք այն»,- նշեց պատգամավորը։
«Այսօր խոսում եք նրա մասին, որ պարտավորված եք եղել ՀՀ տարածքային ամբողջականությունը պահելու համար այդ հայտարարությունը ստորագրել կամ ճանաչել Արցախն Ադրբեջանի կազմում։ Հիմա հարց է առաջանոււմ՝ ապահովեցի՞ք ՀՀ տարածքայն ամբողջականությունը, կասեցրեցիք բոլոր այն հնարավոր սպառնալիքները, որոնք որ այսօր գոյացած են ՀՀ-ի առջև, պատասխանը «ոչ»-ն է։ Միջազգային կոնսոլիդացիայի փոխարեն մենք այսոր ստացել ենխ միջազգային մեկուսացում»,- հավելեց նա։
Աննա Գրիգորյանը հարցրեց՝ «Ի՞նչ եք անում, որպեսզի թույլ չտաք հնարավոր նոր էսկալացիա» և «ի՞նչ եք բանակցել, ի՞նչ եք խոստացել, որ Ադրբեջանն ուզում է ուժի սպառնալիքով ստանալ»։
«Ադրբեջանն ուժի սպառնալիքով ուզում է ստանալ այն, ինչը դուք եք խոստացել»,- ի պատասխան ասաց Փաշինյանը։
«Ես եմ խոստացե՞լ»,- տեղից արձագանքեց ընդդիմադիր պատգամավորը։
«Եթե դուք կապ չունեք այստեղ նստած մարդկանց հետ, ուրեմն, Դուք չեք խոստացել։ Ադրբեջանն ուզում է ստանալ այն, ինչը որ դուք 1999 թվականին պայմանավորվել եք։ Դա է ուզում ստանալ։ Ադրբեջանն ուզում է ստանալ այն, ինչը դուք ավելի ուշ էլ եք պայմանավորվել։ Ադրբեջանն ուզում է ստանալ այն, երբ Սերժ Սարգսյանը հայտարարում էր, որ «մենք համաձայնվել ենք դուրս գալ 7 շրջաններից, բայց ամեն անգամ Ադրբեջանը նորանոր պահանջներ էր առաջադրում։ Այ, դա է ուզում ստանալ»,- ասաց կառավարության ղեկավարը։
«Միջազգային մեկուսացման մասին եք խոսում, զենքը որ Ադրբեջանը ձեռք է բերել, ե՞րբ է ձեռք բերել և որտեղի՞ց։ Այդ ընթացքում ՀՀ-ն ինչքան զենք է ձեռք բերել։ Այո, ճիշտ եք ասում, միջազգային մեկուսացման մասին»,- հավելեց նա՝ միջազգային մեկուսացման փաստ նշելով 2017 թվականից Ադրբեջանի կողմից զենք ձեռք բերելը նաև Ռուսաստանից։