Надрукаваны адрыўны каляндар “Наш край” на 2024 год
У менскім выдавецтве “Беларусь” выйшаў з друку беларускамоўны адрыўны каляндар “Наш край” на 2024 год.
У календары выдаўцы прапануюць адправіцца ў падарожжа па беларускім краі. Тут надрукавана шмат цікавага пра Беларусь, яе гісторыю, культуру, прыроду.
Каляндар дапаможа прасачыць юбілейныя даты вядомых суайчыннікаў – юбіляраў 2024 года: вучоных, пісьменнікаў, акцёраў, мастакоў, архітэктраў, якія жылі ў розныя часы і ўслаўлялі наш край. Сярод юбіляраў у наступным годзе – Васіль Быкаў (100 гадоў), Еўфрасіння Полацкая (920 гадоў), Адам Гурыновіч (155 гадоў), Мікола Хведаровіч (120 гадоў), Аляксандр Ельскі (190 гадоў) і іншыя.
Значнае месца ў выданні адведзена традыцыйным абрадам і звычаям. Не засталіся па-за ўвагай і прадстаўнікі флоры і фаўны з Чырвонай кнігі Рэспублікі Беларусь. Друкуюцца ў календары таксама парады псіхолагаў, педагогаў, садаводаў і агароднікаў. Ёсць таксама рэцэпты прыгатавання страў нацыянальнай і сусветнай кухні.
Змешчаны ў “Нашым краі” вершы Янкі Купалы Якуба Коласа, Максіма Багдановіча, Міхася Чарота, Петруся Броўкі і іншых паэтаў. Каляндар надрукаваны накладам 4 тысячы асобнікаў.
Беларускае Радыё Рацыя
Artykuł Надрукаваны адрыўны каляндар “Наш край” на 2024 год pochodzi z serwisu БЕЛАРУСКАЕ РАДЫЁ РАЦЫЯ.