Огромен број жртви во поплавите во Либија, продолжува потрагата по исчезнатите
Поплавата беше предизвикана од силна бура што ги скрши браните во близина, предизвикувајќи порој од вода што опустоши четвртина и повеќе од тој медитерански град, однесувајќи ги зградите заедно со нивните жители.
Се проценува дека околу 10 000 луѓе се водат како исчезнати. Се верува дека поројот повлекол многумина во морето. Еден жител на Дерна, Мустафа Салем, рече дека досега изгубил 30 членови од своето семејство. Конвои со помош и камиони со булдожери се упатија кон градот во средата.Поплавата предизвика масовно уништување во Дерна каде улиците се покриени со урнатини, кал и шут.
Сателитските фотографии од градот пред и по катастрофата покажуваат дека некогаш релативно тесниот воден пат низ центарот на градот сега е неколку пати поширок, додека зградите покрај брегот исчезнале. Големи штети може да се забележат и во други делови од градот каде надојдената вода се излеа од потокот.Спасувачките операции се комплицирани бидејќи Либија е политички поделена.
Меѓународно признатата Влада на национално единство е со седиште во Триполи, во западна Либија. Дерна се наоѓа во источниот регион каде што работи паралелната администрација и каде што е под контрола Либиската национална армија на командантот Калифа Хафтар.
Либискиот премиер Абдулхамид ал-Дбеибах, шеф на владата со седиште во Триполи, во вторникот рече дека поплавите се катастрофа без преседан. Шефот на Претседателскиот совет на Либија, Мохамед ал Менфи повика на национално единство.
Канцеларијата на ОН за координација на хуманитарни прашања соопшти дека екипите за итни случаи се мобилизирани да помогнат на терен. Владите на другите земји, вклучително и Катар и Турција, побрзаа да обезбедат помош за Либија.