Вакиллар палатаси раиси президент Байденга нисбатан тергов ўтказишга буйруқ берди
Маккарти тергов “ҳокимиятни суиистеъмол қилиш, одил судловга тўсқинлик ва коррупция” иддаолари асосида ўтказилишини айтди. Раис журналистларга берган интервьюсида бу борада Вакиллар палатасининг тегишли қўмиталарига буйруқ берганини билдирди. Маккарти “давлат раҳбарига нисбатан жиддий ва ишонса бўладиган шубҳалар” борлигини таъкидлади.
“Би-би-си”нинг хабар беришича, Республикачилар партияси 2023 йилнинг январида Вакиллар палатасида назоратни ўз қўлига киритганидан бери демократ президент фаолиятини тергаб келмоқда. Улар 46-президентнинг ўғли Хантер Байденнинг бизнес алоқаларини шубҳали деб ҳисоблайдилар. Хантер Байденга нисбатан федерал тергов ўтказилмоқда. У солиқларни яширганликда гумонланмоқда. Аммо шу кунгача Вакиллар палатасида республикачилар ўтказган тингловларда президент Байденнинг қонунларни бузганига оид далиллар топилган эмас.
Оқ Уй расмийлари Маккартининг баёнотига муносабат билдирар экан, республикачилар Байденнинг қонунни бузгани тўғрисида бирорта далил келтирмаганини таъкидлади.
Мазкур тергов президентлик сайлови арафасидаги тарғибот-ташвиқот кампанияси фонида ўтказилади. Жо Байден ҳам, собиқ президент Дональд Трамп ҳам сайловда иштирок этишини билдирган.