ՉԼ. «Ուրարտուն» 89-րդ րոպեին գոլ բաց թողեց և պարտվեց «Զրինսկիին»
Fastex Հայաստանի Պրեմիեր լիգայի նորընծա չեմպիոն Երևանի «Ուրարտուն» Չեմպիոնների լիգայի որակավորման առաջին փուլի առաջին խաղում 0-1 հաշվով պարտվեց բոսնիական «Զրինսկիին»:
Երևանի «Ուրարտու» ստադիոնում կայացած հանդիպման առաջին խաղակեսում գնդակին հիմնականում տիրում էր Բոսնիա և Հերցեգովինայի չեմպիոնը: Խաղակեսի ընթացքում եղավ երեք լուրջ գոլային պահ, երկու դեպքում դարպասի գրավմանը մոտ էր «Զրինսկին»: Դրվագներից մեկում «Ուրարտուին» փրկեց Հայաստանի հավաքականի կիսապաշտպան Ուգոչուկվու Իվուն, իսկ մյուս դրվագում օգնության հասավ դարպասաձողը:
Խաղակեսի վերջնամասում «Ուրարտուի» բրազիլացի կիսապաշտպան Մարկոս Ժունիորը մտավ մրցակցի տուգանային հրապարակ, սակայն լավ դիրքից շեղ հարվածեց:
Երկրորդ խաղակեսի մեկնարկում «Ուրարտուի» ավագ Ժիրայր Մարգարյանը կարող էր բացել հանդիպման հաշիվը, սակայն Հայաստանի հավաքականի պաշտպանի իրացրած տուգանային հարվածից հետո գնդակը դիպավ հորիզոնական դարպասաձողին:
Երկրորդ խաղակեսում հիմնականում գնդակին տիրում էր Դմիտրի Գունկոյի գլխավորած թիմը: Հանդիպման վերջնամասում «Զրինսկիի» պաշտպանը սխալվեց և գնդակը նվիրեց «Ուրարտուի» ֆրանսիացի հարձակվող Յայա Սանոգոյին, որի թույլ հարվածից հետո մրցակցի դարպասապահը փրկեց իր թիմին: Լոնդոնի «Արսենալի» նախկին հարձակվողը 86-րդ րոպեին վնասվածքի պատճառով փոխարինվեց, խաղադաշտ դուրս եկավ կիսապաշտպան Արաս Օզբիլիսը:
Խաղի միակ գոլը գրանցվեց 89-րդ րոպեին, անկյունայինի խաղարկումից հետո «Ուրարտուի» ռուս դարպասապահ Ալեքսանդր Մելիխովի սխալից հետո «Զրինսկիին» հաղթանակ պարգևեց խորվաթ պաշտպան Մատեյ Սենիչը:
Այս դիմակայության պատասխան խաղը տեղի կունենա մեկ շաբաթ անց Բոսնիա և Հերցեգովինայի Մոստար քաղաքի «Զրինսկի» ստադիոնում;
Չեմպիոնների լիգա, որակավորման առաջին փուլ, առաջին հանդիպում
«Ուրարտու» (Հայաստան) — «Զրինսկի» (Բոսնիա և Հերցեգովինա)՝ 0-1 (տեսանյութ)
Մատեյ Սենիչ, 89
Հիշեցնենք, որ որակավորման երկրորդ փուլ դուրս գալու դեպքում «Ուրարտուն» կմրցի «Սլովան Բրատիսլավա» (Սլովակիա) — «Սվիֆթ Էսպերանժ» (Լյուքսեմբուրգ) զույգի հաղթողի հետ։ Դիմակայության պարտվողը պայքարը կշարունակի Կոնֆերենցիաների լիգայի որակավորման երկրորդ փուլում, որտեղ կմրցի «Ֆարուլ» (Ռումինիա) — «Շերիֆ» (Մոլդովա) զույգի պարտվողի հետ:
The post ՉԼ. «Ուրարտուն» 89-րդ րոպեին գոլ բաց թողեց և պարտվեց «Զրինսկիին» appeared first on ԳԱԼԱ.