„ევროპამ ჩვენზე თითქოს უარი თქვა, ცნობილი ტურ-ოპერატორები ტურებს ვერ ყიდიან, არაერთმა ახსენა – რუსეთში რომ გვინდოდეს წასვლა, წავიდოდითო“
„ევროპამ ჩვენზე თითქოს უარი თქვა, ცნობილი ტურ-ოპერატორები ტურებს ვერ ყიდიან, არაერთმა ახსენა – რუსეთში რომ გვინდოდეს წასვლა, წავიდოდითო,“ – ამის შესახებ რადიო „პალიტრასა“ და „პალიტრანიუსის“ გადაცემაში „საქმე“ტურ-ოპერატორთა ასოციაციის ხელმძღვანელმა ია თაბაგარმა ტურიზმის სექტორში სტუმრების სიმცირის შესახებ საუბრისას განაცხადა.
„როგორც კი გადავხედავთ ჩვენს სტატისტიკას და შემოსვლებს ქვეყანაში მაშინვე ცხადი გახდება რომ ევროპამ ჩვენზე თითქოს უარი თქვა. ევროპაში მე ვგულისხმობ ბალტიისპირეთის ქვეყნებსაც კი, საიდანაც ყოველ ზამთარს თუ ზაფხულს ინტენსიურად შემოდიოდნენ საქართველოში და სარგებლობდნენ სხვადასხვა სერვისებით.
ამ სიტყვების მიღმა იგულისხმება რომ უკვე არაერთმა ცნობილმა დიდმა ტურ-ოპერატორმა, რომლებიც ზოგი 10-20 წელია საქართველოსთან მუშაობენ და ყოველ ზაფხულს გზავნიდნენ ტურისტებს, ახლა არ ყავთ ტურისტები. თვითონ ამბობენ რომ ვერ ყიდიან ტურებს. ჩვენ ზუსტი მიზეზები ბოლომდე არ ვიცით, მაგრამ მაგალითს მოვიყვან რომ არაერთმა ახსენა: – რუსეთში რომ გვინდოდეს წასვლა წავიდოდითო, რუსების თავმოყრა სადაც არის ჩვენ იქ პრინციპულად არ წავალთო, ამიტომ ეს ძალიან გვიშლის ხელს. აქ მარტო იმაზე კი არ არის საუბარი, რომ მათ რუსული საუბრის მოსმენა არ უნდათ, საუბარია იმაზე რომ ევროპელები კანონმორჩილები არიან, როდესაც ისინი ხედავენ რომ მათი ქვეყნები სანქციებს ადებენ სხვადასხვა კომპანიებს, ქვეყნებს თუ მიმართულებებს და ამ დროს საქართველო იქ არ არის, ზუსტად აქ არის მე თუ მკითხავთ ერთ-ერთი პრობლემა, თუმცა არა ერთადერთი,“ – განაცხადა თაბაგარმა.