Путин ва Эрдоған ўртасидаги музокаралар дон битимининг сўнгги умиди деб баҳоланди
Туркия ва Россия президентлари Ражаб Тоййиб Эрдоған ва Владимир Путин ўртасидаги музокаралар 17 июлдан кейин дон бўйича келишувни узайтириш бўйича “ягона умид” бўлиб қолмоқда, деб ёзади “РИА Новости” манбасига таяниб. Агентлик суҳбатдошига кўра, амалиёт шуни кўрсатадики, икки етакчи ўртасидаги суҳбат қийин даврда вазиятни ўзгартириши мумкин.
«Бизнинг амалиётимиз шуни кўрсатадики, айнан икки давлат раҳбарлари ўртасидаги музокаралар вазиятни ўзгартиришга қодир ва ҳозирги мураккаб давр ҳам бундан мустасно эмас. Жаноб президент Эрдоған Путин билан музокаралар ўтказишни маълум қилди, биз ижобий натижага умид қиламиз”, — деди у.
Қора денгиз ташаббусини узайтириш эҳтимоли ҳақидаги саволга жавоб берар экан, агентлик суҳбатдоши “бугунги кунга қадар оптимизм йўқ”, деб таъкидлади.
Аввалроқ Туркия президенти Ражаб Тоййиб Эрдоған Россия президенти Владимир Путин билан ғалла бўйича келишув бўйича музокаралар ўтказилишига умид билдирган эди. Унга кўра, Анқара 17 июлдан кейин механизмни икки йилга узайтиришни кутмоқда.