اردوغان په ناټو کې د سویډن د غړيتوب غوښتنه خپل پارلمان ته لېږي
سټولټنبرګ پرون د ناټو د سرمشریزې په درشل کې د ترکیې له ولسمشر رجب طیب اردوغان او د سویډن له صدر اعظم اولف کریسټرسون سره تر کتنې وروسته دا موضوع اعلان کړه.
ټاکل شوې چې د ناټو سازمان په دوه ورځنۍ سرمشریزه کې پر اوکراین د روسیې د یرغل او د روسیې د ګواښونو پر وړاندې د ناټو د چمتوالي په تړاو خبرې وشي.
دا غونډه نن سه شنبه د لېتوانیا په پلازمېنه ویلنیوس ښار کې پیلېږي.
ترکیه له څه مودې راهیسې په ناټو تړون کې د سویډن د غړیتوب مخالفت کوي، دا ځکه چې په خبره یې سویډن کوردي فعالانو ته پنا ورکړې ده.
انقره دغه فعالان ترهګر بولي.