У Кыргізстане дазволілі выкарыстоўваць ня толькі імя па бацьку, але і па маці

У Кыргізстане дарослы грамадзянін, старэйшы за 16 гадоў, мае права выкарыстоўваць ня толькі імя па бацьку, але і па маці. Канстытуцыйны суд прыняў рашэньне ўнесьці зьмены ў дзеючае заканадаўства, інфармуе партал «АКИpress».


Раней актывістка Алтын Капалава зьвярнулася ў Канстытуцыйны суд у гэтым пытаньні. Яна апублікавала рашэньне суда ў сацыяльнай сетцы.


Канстытуцыйны суд даручыў Кабінэту міністраў унесьці адпаведныя зьмены ў дзеючае прававое рэгуляваньне, каб выключыць парушэньне прынцыпаў роўнасьці і дыскрымінацыю на падставе полу.


«Рашэньне канчатковае. Абскарджваньню не падлягае. Яно ўступае ў сілу з моманту абвяшчэньня. Рашэньне зьяўляецца абавязковым для ўсіх дзяржаўных органаў, мясцовых органаў улады, чыноўнікаў, дзяржаўных аб’яднаньняў, юрыдычных асоб і асоб, падлягае выкананьню на ўсёй тэрыторыі рэспублікі», — гаворыцца ў адказе суду актывістцы.


Алтын Капалава паведаміла, што цяпер любы дарослы можа прыняць імя па маці. Яна напісала, што яе 16-гадовы сын, які неўзабаве пойдзе па пашпарт, можа прыняць яе імя замест імя па бацьку.