Իրանը նորանշանակ դեսպանին Շվեդիա չի ուղարկի՝ Ղուրանի այրման պատճառով

Չնայած Իրանի նոր դեսպանին Շվեդիա ուղարկելու վարչական ընթացակարգերի ավարտին, իսլամական հանրապետության արտաքին գործերի նախարարությունը չի պատրաստվում այժմ իր նոր դեսպանին ուղարկել Ստոկհոլմ:


Իրանի ԱԳ նախարար Հոսեյն Ամիր-Աբդոլլահյանը կիրակի օրը Թվիթերում հաստատել է, որ Թեհրանը նոր դեսպան չի ուղարկի Շվեդիա՝ սկանդինավյան երկրում Ղուրանի այրման պատճառով:


Հոջաթոլլահ Ֆողանին վերջերս նշանակվել է Շվեդիայում Իրանի նոր դեսպան, գրում է իրանական Mehr-ը։


Ավելի վաղ Իրանի արտաքին գործերի նախարարությունը կանչել էր Թեհրանում Շվեդիայի գործերի ժամանակավոր հավատարմատարին՝ ի նշան բողոքի եվրոպական երկրում մահմեդականների սուրբ գրքի պղծման դեմ։