Բլինկենը հայտարարել է Ռուսաստանի դեմ արտահանման նոր սահմանափակումների մասին
Մայիսի 31-ին Միացյալ Նահանգները կհայտարարի Ռուսաստանի դեմ նոր սահմանափակումների մասին, որոնք վերաբերելու են անօդաչու սարքերում օգտագործվող տեխնոլոգիաների արտահանման վերահսկողության խստացմանը։ Այս մասին հայտարարել է ԱՄՆ պետքարտուղար Էնթոնի Բլինկենը, գրում է kommersant.ru-ն:
«Վաղը մենք կհայտարարենք նոր միջոցների մասին, որոնք խստացնում են արտահանման հսկողությունը իրանական անօդաչու թռչող սարքերում հայտնաբերված տեխնոլոգիաների նկատմամբ, որոնք օգտագործվում են ուկրաինացի խաղաղ բնակիչների և քաղաքացիական ենթակառուցվածքների վրա հարձակումների ժամանակ, ինչպես նաև կհակազդենք ռուսական ապատեղեկատվությանը, կաջակցենք իրավապաշտպաններին», - ասել է Բլինկենը մամուլի ասուլիսում:
Մայիսի 15-ին Սպիտակ տունը հայտնել է, որ ամերիկյան նախագահի վարչակազմը համաձայնել է պատժամիջոցներ կիրառել Ռուսաստանի և Իրանի միջև ռազմատեխնիկական համագործակցության մեջ ներգրավվածների դեմ։ Խոսքը հիմնականում Մոսկվային իրանական անօդաչու թռչող սարքերի, ինչպես նաև Ուկրաինայում ռազմական գործողությունների ժամանակ օգտագործված հրետանային արկերի և զինամթերքի մատակարարման մասին էր։ Ռուսաստանն ու Իրանը հերքում են այդ մատակարարումների մասին տեղեկությունը։