Սկսվել է ռուսական միջուկային զենքի տեղափոխումը Բելառուս․ Լուկաշենկո
Բելառուսի նախագահ Ալեքսանդր Լուկաշենկոն հայտարարել է ռուսական միջուկային զենքի տեղափոխման մեկնարկի մասին, հայտնել է BelTA-ն։ Այս մասին նա ասել է՝ պատասխանելով հարցին, թե ինչ է քննարկել ՌԴ նախագահ Վլադիմիր Պուտինի հետ Մոսկվայում Եվրասիական տնտեսական համաժողովում։
«Պետք էր պատրաստել այնտեղ և՛ պահեստավորման վայրեր և՛ այլն։ Մենք այդ ամենն արել ենք: Ուստի սկսվել է միջուկային զենքի տեղափոխումը»,- ասել է Լուկաշենկոն։ Հստակեցնող հարցին, թե Բելառուսում արդեն միջուկային զենք կա՞, պետության ղեկավարը պատասխանել է. «Հնարավոր է»։
Բելառուսի նախագահը հավելել է, որ Մինսկը պատասխանատու կվերաբերվի տեղակայված ռուսական միջուկային զենքին, և «ամեն ինչ կարգին կլինի»։
Բելառուսում ռուսական մարտավարական միջուկային զենքի տեղակայման մասին ՌԴ նախագահ Վլադիմիր Պուտինը հայտարարել էր մարտի 25-ին։ Նա հայտնել էր, որ մինչև հուլիսի 1-ը Մոսկվան կավարտի հանրապետությունում մարտավարական միջուկային զենքի պահեստի շինարարությունը։ Պուտինը նաև ասել էր, որ այն չի փոխանցվի Բելառուսի իշխանությունների վերահսկողությանը։