ایپياېل؛ تر دوه سیالیو وروسته به د ۲۰۲۳ کال اتله لوبډله معلومه شي
د می میاشتې په ۲۶مه نېټه به ګجرات ټایټانز او ممبي اینډینز په دویم «کوالیفایر» کې ولوبيږي او ګټونکې لوبډله یې پایلوبې ته لار پيدا کړي.
ممبي لوبډلې د دې سیاليو په منځلوبه کې لکنو سوپرجاینټز ته په ۸۲ منډو ماتې ورکړه او دې پړاو ته یې لار پیدا کړه.
د ګجرات لوبډله که څه هم د نومرو په جدول کې په لومړي مقام وه، خو په لومړي کوالیفایر کې یې چینای سوپرکینګز ته د ۱۵ منډو په تفاوت لوبه وبایلله.
په یادو سیالیو کې د افغان لوبغاړو لوبې د کرکټ کارپوهانو له لوري ستایل شوي دي او دوی یې د ایپيایل سیالیو ارزښتمن لوبغاړي بللي.
نوینالحق چې د لکنو لوبډلې لپاره لوبه کوله، په خپله وروستۍ سیالۍ کې یې د ممبي ۴ پياوړي لوبغاړي وسوځول.
دغه راز راشدخان او نوراحمد بیا د ګجرات لپاره لوبه کوي او دواړو تر دې دمه د خپلې لوبډلې په بریاو کې مهمه ونډه ترسره کړې ده.
د ویلو ده چې، د روان کال د ایپيایل سیالیو پایلوبه به د می میاشتې په ۲۸مه نېټه ترسره شي.