პუტინი: რუსეთი აუცილებლად მიაღწევს სამართლიან მსოფლიო წესრიგს

კრემლის ლიდერის ვლადიმერ პუტინის თქმით, რუსეთი, სხვა ქვეყნებთან ერთად, აუცილებლად მიაღწევს სამართლიან მსოფლიო წესრიგს.

რუსეთის პრეზიდენტის თქმით, მოდელი, სადაც ზოგიერთი სახელმწიფო სხვის ხარჯზე ვითარდება, წარსულში დარჩება.

პუტინი ირწმუნება, რომ რუსეთის ფედერაცია მზად არის ყველაზე მჭიდრო ურთიერთქმედებისთვის ყველა დაინტერესებულ სახელმწიფოსთან, რათა დაუპირისპირდეს „საერთო საფრთხეებსა“ და გამოწვევებს, რომელთა წინაშეც დღეს კაცობრიობა დგას.

„ჩვენ ძალიან ვაფასებთ იმ ფაქტს, რომ რუსეთს ჰყავს მრავალი პარტნიორი სხვადასხვა რეგიონში და სხვადასხვა კონტინენტზე, ჩვენ გულწრფელად ვაფასებთ ისტორიულად ძლიერ, მეგობრულ, ჭეშმარიტად სანდო კავშირებს აზიის, აფრიკისა და ლათინური ამერიკის სახელმწიფოებთან. ჩვენ ამ კავშირებს და მეგობრობას გავაძლიერებთ“, – აცხადებს პუტინი.