მაჰსა ამინის ოჯახი ირანის უშიშროების ძალებს ბრალს სდებს მათი შვილის საფლავის შეურაცხყოფაში
ამინის ოჯახის ადვოკატმა, სალეჰ ნიკბახტმა ჟურნალისტებს უთხრა, რომ 21 მაისს, დილით, "პირები, რომლებიც წარსულში ამგვარი მდარე ქცევებით არიან ცნობილი, თავს დაესხნენ და გაანადგურეს მაჰსა ამინის საფლავი".
ადვოკატმა წარმოადგინა დაზიანებული საფლავის ფოტოები, რომლებიც მას ამინის მშობლებმა გადასცეს. ადვოკატის თქმით, ამინის მამა ამბობს, რომ მთავრობის წარმომადგენლებმა არ დაუშვეს საფლავზე დამცავი კონსტრუქციის აგება - ისინი შემდუღებელს დაემუქრნენ, რომ ამ სამუშაოს შესრულების გამო მისი ბიზნესი დაიხურებოდა. თუმცა ადვოკატს არ წარმოუდგენია კონკრეტული მტკიცებულება, რომელიც საფლავის დაზიანებას დააკავშირებდა უშიშროების სამსახურებთან.
ირანის სამთავრობო ძალებს უწინაც ადანაშაულებდნენ დახოცილი ან სიკვდილით დასჯილი დემონსტრანტების, კულტურული ფიგურების, პოეტების, მწერლების, მხატვრების, კრიტიკული პოლიტიკური ძალების თუ გარკვეული რელიგიური უმცირესობების წარმომადგენლების საფლავების განადგურებაში.