Ռուսաստանի հետ ուղիղ ավիաչվերթների վերականգնումը չի վտանգում Վրաստանի եվրոպական ապագան. Ղարիբաշվիլի
Վրաստանի եվրոպական ապագան վտանգված չէ, քանի որ կառավարությունն իր արևմտյան գործընկերներին բացատրում է Ռուսաստանի հետ առևտրի և տրանսպորտի կարևորությունը։ Այս մասին հայտարարել է Վրաստանի վարչապետ Իրակլի Ղարիբաշվիլին՝ պատասխանելով լրագրողների՝ Ռուսաստանի հետ ուղիղ չվերթների վերականգնման մասին հարցին:
«Ռուսաստանի հետ ուղիղ ավիաչվերթների վերականգնումը վտանգ չի ներկայացնում Վրաստանի եվրոպական ապագայի համար՝ հաշվի առնելով այն հանգամանքը, որ ԵՄ-ի թեկնածուի կարգավիճակի մասին որոշումը պետք է հայտարարվի աշնանը»,- նշել է Վրաստանի վարչապետը:
Ղարիբաշվիլին նաև հավելել է, որ Վրաստանի տարածքով պատժամիջոցների տակ գտնվող ոչ մի ինքնաթիռ չի թռչի:
Խոսելով ազգային քաղաքականության և միջազգային պատժամիջոցների մասին՝ Ղարիբաշվիլի նշել է․
«Մի բան եմ ուզում ասել՝ մեր վրացի տղաները զոհվեցին, արյուն թափեցին ոչ միայն Վրաստանում, այլ ՆԱՏՕ-ի առաքելություններում՝ Աֆղանստանում, Իրաքում։ Ի՞նչ ստացանք դրա դիմաց։ Այն, որ օգոստոսյան պատերազմից հետո ոչ ոք չվերանայեց և փոփոխություններ չարեց Ռուսաստանի նկատմամբ իր քաղաքականության մեջ։ Իմ նպատակն է փրկել մեր երկիրը և, պաշտպանել երկրի ու մեր բնակչության շահերը»։
The post Ռուսաստանի հետ ուղիղ ավիաչվերթների վերականգնումը չի վտանգում Վրաստանի եվրոպական ապագան. Ղարիբաշվիլի appeared first on ԳԱԼԱ.